"უკრაინას - მძიმე დღეები, კვირეები, თვეები ელის"!

ვიქტორ იანუკოვიჩი არ ცნობს უკრაინის უმაღლესი რადას გადაწყვეტილებას მისთვის საპრეზიდენტო უფლებამოსილების ჩამორთმევის თაობაზე და მას არაკანონიერად მიიჩნევს. იგი თვლის, რომ მხოლოდ ნახევარი დღის განმავლობაში იმყოფებოდა სამუშაო ვიზიტად ხარკოვში, რაც აღქმული იყო მოვალეობის შესრულებაზე უარის თქმად! იანუკოვიჩმა განაცხადა, რომ მოქმედ პრეზიდენტად რჩება და მოვალეობის შესრულებას განაგრძობს.

აი, ასეთ პოლიტიკურ ორომტრიალშია გახვეული უკრაინა! სხვადასხვა ვერსიები გამოითქმება, თუ რა განვითარება მოჰყვება ყოველივეს...

მოკლედ, გავრისკავ და გეტყვით ჩემს პროგნოზს მოვლენების შესაძლო განვითარების შესახებ:

1. იანუკოვიჩი არ გადადგება და 21 თებერვალს ხელმოწერილი შეთანხმების პირობების დაცვას მოითხოვს, რაც ითვალისწინებს ვადამდელი საპრეზიდენტო არჩევნების ჩატარებას ამ წლის ბოლომდე, რომელსაც ოპოზიციამ მოაწერა ხელი გერმანიის და პოლონეთის საგარეო საქმეთა მინისტრების თანდასწრებით!

2. იანუკოვიჩი კიევში არ დაბრუნდება, მოითხოვს "პოლიტიკურ თავშესაფარს" რუსეთში, ან "გაძლიერებული დაცვის (რუსეთის) ქვეშ, იმოძრავებს როგორც პრეზიდენტი" სამხრეთ-აღმოსავლეთ უკრაინაში - ხარკოვი, დონეცკი, დნეპროპეტროვსკი, ოდესა, სიმფეროპოლი და სევასტოპოლი!..

3. რუსეთი, პუტინი უკანონოდ ცნობს უკრაინის რადას გადაწყვეტილებებს და იანუკოვიჩს აღიარებს კანონიერ პრეზიდენტად! აგრეთვე, რუსეთ-უკრაინას შორის გაფორმებული ხელშეკრულებების, მათ შორის სამხედრო, ერთადერთ გარანტად!

4. ხვალ, 23 თებერვალს სოჭის ოლიმპიადის დახურვაა, ამიტომ რუსეთი უკომენტაროდ იქნება... მაგრამ, 24 თებერვალს პუტინის განცხადება გახდება რუსეთის სამოქმედო გეგმა უკრაინასთან მიმართებით!..

5. "უკრაინულ პარტიაში", პუტინის "აქტივია": 8 მილიონიანი რუსული დიასპორა, ყირიმის ავტონომიური რესპუბლიკა, სევასტოპოლში ბაზირებული რუსეთის შავი ზღვის ფლოტი, პრორუსული უკრაინული ეროვნების მოსახლეობა, რუსეთის მოქალაქეობის მქონე პირები და ა.შ.

6. პუტინ-მერკელის და პუტინ-ობამას დღევანდელი სატელეფონო საუბრების შინაარსი, სავარაუდოდ თებერვალს ბოლომდე გახდება ცნობილი იმის მიხედვით, თუ რამდენად "აგრესიული", ან პირიქით, "გაწონასწორებული" იქნება მოსკოვის მოქმედება!

7. ზემოთ ჩამოთვლილი ვარაუდები მცდარიც რომ იყოს, ყველა შემთხვევაში, უკრაინას მძიმე დღეები, კვირეები, თვეები ელის და 2014 წლის ბოლოს გაირკვევა, თუ სად, როგორ, ვისთან და რა საზღვრებში იქნება უკრაინის სახელმწიფო!..

ჯუმბერ კირვალიძე,

პოლიტოლოგი