„პენსიონერები კვლავაც მედიკამენტების გარეშე რჩებიან“, - აღნიშნულ თემაზე დღეს, „მემარცხენე ალიანსის“ პოლიტიკურმა მდივანმა პაატა ჯიბლაძემ პარტიის ოფისში ბრიფინგი გამართა და მთავრობისგან სახელმწიფო ბიუჯეტის პროექტში ცვლილებების შეტანა მოითხოვა, რომლის შედაგადაც პენსიის ოდენობა 200 ლარამდე  გაიზრდება.


ჯიბლაძემ აღნიშნა, რომ საქართველოს მთავრობის მიერ პარლამენტისათვის მესამე მოსმენისთვის განსახილველად დაბრუნებულ 2016 წლის სახელმწიფო ბიუჯეტის პროექტში მხოლოდ ნაწილობრივად არის დაკმაყოფილებული პარტია „მემარცხენე ალიანსის“ მოთხოვნა პენსიების 40 ლარით გაზრდასთან დაკავშირებით, ამავე დროს არ არის გათვალისწინებული პარტიის მოთხოვნა, რომ პენსიონერების  მედიკამენტებით უზრუნველყოფა შესულიყო საყოველთაო ჯანდაცვის პროგრამაში.


„პარლამენტისაგან მოვითხოვთ, მთავრობასთან გაიაროს დამატებითი კონსულტაციები და არსებული ფინანსური რესურსების გათვალისწინებით, სახელმწიფო ბიუჯეტის პროექტში შეიტანოს ცვლილებები, რომლის შედაგადაც პენსიის ოდენობა გაიზრდება 200 ლარამდე, ხოლო საყოველთაო ჯანდაცვის პროგრამით პენსიონერებისათვის მედიკამენტები გახდება უფასო. ამით კოალიცია „ქართული ოცნება“ ნაწილობრივ მაინც შეასრულებს თავის წინასაარჩევნო დაპირებას - გაზარდოს პენსია საარსებო მინიმუმამდე“- განაცხადა პაატა ჯიბლაძემ.