დიახ, ნატო–ში "უ–MAP–ოდ" არ მიგვიღებენ! ეს გარკვევით წერია ბრიუსელში, დღეს მიღებულ ნატო–ს მინისტერიალის დასკვნით კომუნიკეში. ჯერ მაპ–ი და მერე ნატო–ს წევრობაო. არადა, სულ ახლახანს მავანი ქართველი პოლიტიკოსები გამუდმებით გვიმტკიცებდნენ, რომ საქართველოს უ–მაპოდაც მიიღებენ ალიანსში, განსაკუთრებით აქტიურობდა თავდაცვის მინისტრი, ქ–ნი ხიდაშელი.

სამაგიეროდ, ნატო–ს მინისტერიალმა მიწვევა გაუგზავნა მონტენეგროს, რომელიც გაისად ვარშავის სამიტზე ნატო–ს 29 – ე წევრი გახდება. ნუ, რას ვიზამთ, მონტენეგრო საქართველოსგან განსხვავებით ძალიან შორს არის რუსეთისგან, თუმცა, ბალტიის სახელმწიფოები ჩვენსავით ესაზღვრებიან "დედა"–რუსეთს, მაგრამ ისინი მაინც მიიღეს თავის დროზე, ეტყობა ხელსაყრელი პოლიტიკური კონტექსტი შეარჩიეს და ალბათ იმიტომ. თანაც, ბალტიის სამივე სახელმწიფო "ერთად იდგა", განსხვავებით სამხრეთ კავკასიის სახელმწიფოებისგან, სადაც ორს ერთმანეთთან ომი აქვს (სომხეთი, აზერბაიჯანი), ხოლო, მესამე (საქართველო) დანაწევრებულია სეპარატისტულ 2 რეგიონად, რომლებიც "აღიარა" რუსეთმა და თავისი სამხედრო ბაზებიც განათავსა აქ.

რა არის იცით, გულდასაწყვეტია ის, რომ არც კი შეიძლება ერთმანეთს შეადარო საქართველოს და მონტენეგროს წვლილი ნატო–ს ეგიდით წარმოებულ სამხედრო კამპანიებში, რადგანაც საქართველომ გაიღო დიდი მსხვერპლი, ავღანეთში და ერაყში, როცა მონტენეგროს მონაწილეობა მხოლოდ სიმბოლურ ხასიათს ატარებდა. გასაგებია ისიც, რომ საქართველოსთან მიმართებაში ნატო–ს მესვეურები სიფრთხილით აკვირდებიან რუსეთის რეაქციას, რასაც არც მალავენ, ამას დაემატა კიდევ "ხიდაშელის ფაქტორიც", რომელმაც ამასწინათ დასავლელ მოკავშირეებს "გეოპოლიტიკური რჩევა" მისცა, მან განაცხადა, რომ – "რუსეთი მაშინ დაშინდება და დაიხევს უკან, როცა დაინახავს, რომ დასავლეთი მზადაა მასთან საომრად ევროპის შუაგულშიო"! როგორ ფიქრობთ, ბატონებო, ამ ხიდაშელისეული შეგონების გამგონი დასავლელი პოლიტიკოსები და პოლიტანალიტიკოსები, როგორ ხასიათზე დადგებოდნენ?!

მოკლედ, ასეა თუ ისე, ხიდაშელმა და თავის წილ რუსეთმა, კვლავ დააფრთხეს ნატო–ს მესვეურები, რომლებმაც დაადასტურეს ბუქარესტის სამიტის გადაწყვეტილება, რომ საქართველო მომავალში გახდება ნატო–ს წევრი, აგრეთვე, დაპირებების ახალი ფრაზები ჩაწერეს ბრიუსელის მინისტერიალის ნატო–ს კომუნიკეში. ასე რომ, აი ასეა საქმე, იმედი ვიქონიოთ, რომ მომავალში რუსეთიც შეიცვლება, საქართველოსაც უკეთესი თავდაცვის მინისტრი ეყოლება და ნატო–ს მესვეურებიც უფრო თამამები იქნებიან!..

ჯუმბერ კირვალიძე,

პოლიტოლოგი