საქართველოს პრეზიდენტი გიორგი მარგველაშვილი მონტენეგროს პრეზიდენტს ფილიპ ვუჟანოვიჩს მონტენეგროს NATO-ში გასაწევრიანებლად მიწვევას ულოცავს. პრეზიდენტის ადმინისტრაცის მიერ გავრცელებულ წერილში ნათქვამია, რომ ეს "ისტორიული გადაწყვეტილება იქნება შთამაგონებელი საქართველოსა და სხვა ასპირანტი სახელმწიფოებისათვის."


"თქვენო აღმატებულებავ, ჩემთვის დიდი პატივია გულითადად მოგილოცოთ თქვენ, მონტენეგროს ხელისუფლებასა და ხალხს, ეს ისტორიული გადაწყვეტილება - NATO-ს 29-ე წევრად გაწევრებისათვის ალიანსის მიწვევა.


მოხარული ვარ აღვნიშნო, რომ თქვენი ხელმძღვანელობით, ამ წლების მანძილზე არსებული გამოწვევების მიუხედავად, მონტენეგრომ ინტეგრაციისაკენ მიმავალ გზაზე განსაკუთრებულ წარმატებას მიაღწია.


გაწეული რთული სამუშაოსა და ძლიერი ძალისხმევის აღიარება ჭეშმარიტი წარმატება და გამარჯვებაა.


დარწმუნებული ვარ, რომ NATO-ს გაფართოება მნიშვნელოვანი წინგადადგმული ნაბიჯია, რომელიც სარგებელს მოუტანს როგორც ალიანსს, ასევე წაახალისებს თქვენი ხალხის კეთილდღეობასა და სახელმწიფოებრიობას.


პატივცემულო პრეზიდენტო, მსურს აღვნიშნო, რომ თქვენი ქვეყნისათვის დღეს მიღებული მნიშვნელოვანი ისტორიული გადაწყვეტილება იქნება შთამაგონებელი საქართველოსა და სხვა ასპირანტი სახელმწიფოებისათვის.


საქართველო განაგრძობს ძალისხმევას გახდეს NATO-ს წევრი ქვეყანა. მტკიცედ მჯერა, რომ ერთობლივი ძალებით წვლილს შევიტანთ ჩვენი საერთო, ევროატლანტიკური თანამეგობრობის სტაბილურობასა და უსაფრთხოებაში.


ვიყენებ ამ შესაძლებლობას და მჯერა, რომ თქვენი ვიზიტი საქართველოში მომავალ წელს, გააძლიერებს ჩვენს თანამშრომლობას და პარტნიორობას. მოუთმენლად ველი, რომ გიმასპინძლოთ საქართველოში.


თქვენო აღმატებულებავ, გთხოვთ მიიღოთ ჩემი ღრმა პატივისცემა და საუკეთესო სურვილები მეგობარი მონტენეგროელი ხალხის მშვიდობისა და კეთილდღეობისათვის".