ასპინძის მუნიციპალიტეტის გამგებელი ლევან ცაბაძე მოსახლეობის წინაშე ანგარიშით წარსდგა. შეხვედრა გაიმართა კულტურის ცენტრში, რომელიც მიმდინარეობდა კითხვა-პასუხის რეჟიმში.


აღნიშნულ შეხვედრაზე ლევან ცაბაძემ მოსახლეობას გააცნო 2013-2015 წლებში განხორციელებული და მიმდინარე ინფრასტრუქტურული პროექტები.


ერთ-ერთი მასშტაბური პროექტი, რომელიც მიმდინარე წელს განხორციელდა, სოფელ ხიზაბავრაში ასფალტო-ბეტონის თითქმის 7 კმ-იანი გზის საფარის დაგებაა, რის გამოც, სოფელ ხიზაბავრის მოსახლეობა ხელისუფლების მიმართ კმაყოფილებას გამოთქვამს.


ასპინძის მუნიციპალიტეტის გამგებლის, ლევან ცაბაძის თქმით, 2017 წლამდე ყველა სოფელს უნდა ჰქონდეს მოასფალტებული მისასვლელი გზა და 21 -ე საუკუნეში მოუწესრიგებელი გზების საკითხი არ უნდა არსებობდეს. სოფელ ხიზაბავრაში უკვე გაყვანილია ბუნებრივი გაზი და აღდგენილია სასმელი წყლის სისტემა.


დაბა ასპინძაში ორი საბავშვო ბაღის სრული რეაბილიტაცია განხორციელდა, რასაც 900 ათასი ლარი მოხმარდა. პროექტი მუნიციპალური განვითარების ფონდის და ასპინძის მუნიციპალიტეტის თანადაფინანსებით დასრულდა.


ასპინძის გამგეობის ინფორმაციით, N 1 საბავშვო ბაღში სრულად შეიცვალა კარ–ფანჯარა და იატაკი, მოეწყო სათამაშო და საძინებელი ოთახები, სამზარეულო, სველი წერტილები, მოპირკეთდა გარე ფასადი. კაპიტალური სარეაბილიტაციო სამუშაოები ჩატარდა N2 სკოლამდელი აღზრდის დაწესებულებაშიც.


გამგებელმა ანგარიშის წარდგენის დასასრულს ასევე ისაუბრა იმ პროექტებზეც, რომლის განხორციელებაც მომავალი წლიდან დაიწყება.