პოლიტოლოგი, ხათუნა ლაგაზიძე guardian.ge-სთან საუბარში „ერთიანი ნაციონალური მოძრაობის“ გარშემო განვითარებულ ბოლოდროინდელ მოვლენებს აფასებს. ლაგაზიძის განცხადებით, "ენმ", სააკაშვილისთვის მოქალაქეობის ჩამორთმევისა და შიდაპოლიტიკური, სააკაშვილ-ადეიშვილისა და ბოკერია-უგულავა-გაბაშვილის დაპირისპირების ფონზე, თანდათან სუსტდება.

პოლიტოლოგი მიიჩნევს, რომ მთავრობა წინასაარჩევნოდ, პარტიის არა გაქრობას, არამედ დასუსტებას ცდილობს. „ბოლოდროინდელი მოვლენები ცხადყოფს, რომ თუ საზოგადოება და ჟურნალისტები არ გამოიჩენენ დიდ ინტერესს, „ერთიანი ნაციონალური მოძრაობა“ ისტორიის საკუთრება გახდება. მნიშვნელოვანი და ძალიან საინტერესოა ხელისუფლების პოზიცია პარტიასთან დაკავშირებით. მთავრობას არ აწყობს სხვა ძალის გამოჩენა პოლიტიკურ ველზე წინასაარჩევნოდ. მას ურჩევნია პოლიტიკური მეტოქე იყოს ენმ-ი, ოღონდ დასუსტებული, რადგან ეს ოპოზიციური პარტია საკმაოდ კარგი მეტოქეა. ბოლოდროინდელი მოვლენები სწორედ პარტიის შესუსტებას ემსახურება. ხელისუფლება „ერთიან ნაციონალურ მოძრაობას“, ფაქტობრივად, ხელოვნური სუნთქვის რეჟიმში ამყოფებს“- აღნიშნა ხათუნა ლაგაზიძემ.