"ძირს სისხლიანი რევოლუციები, გაუმარჯოს მშვიდობიან ევოლუციებს"!

დიახ, კიევის მაიდანზე დაღუპული ათეულობით ადამიანის სიცოცხლე (მარადიული ხსოვნა მათ) არ ღირს იმად, რომ მათ დაღვრილ სისხლზე, ახალგამოჩეკილმა თუ ყავლგასულმა პოლიტიკოსებმა, წინა კორუმპირებული ხელისუფლების სახელმწიფო თანამდებობები გადაინაწილონ!

დღეს, კიევში, "მაიდანის ხალხის" სახელით გავრცელდა წერილის ტექსტი, რომლის ადრესატი ციხიდან ახლადგათავისუფლებული უკრაინის ყოფილი პრემიერ-მინისტრი იულია ტიმოშენკოა, სადაც "მაიდანის სახელით" ხალხი მოუწოდებს მას უარი თქვას საპრეზიდენტო ამბიციებზე... ეს წერილი ადასტურებს იმას, რომ უკვე დაწყებულია კულუარული პოლიტიკური ბრძოლა კიევის "მაიდანის" მთავარ სუბიექტებს შორის, -როგორებიცაა, ტიმოშენკო-იაცენიუკის "ბატკივშინა", ტიაგნიბოკის "თავისუფლება", "მემარჯვენე სექტორი", კლიჩკოს "უდარი" და სხვა წვრილ-წვრილი პოლიტჯგუფები, რომელთა სახელებიც ჯერ ფართოდ ცნობილი არ არის!..

მოკლედ, მრავალსაუკუნოვანი საკაცობრიო გამოცდილება გვასწავლის, რომ არაფერი იცვლება, ასე იყო და ასე ვითარდებოდა ყველა დიდი თუ პატარა რევოლუციები, რომლებსაც ახლავს ძალადობა, სისხლისღვრა, სისასტიკე და ბოლოს, ყველა "აღმატებული" რევოლუცია, მის მონაწილეთა განხეთქილებით და ურთიერთბრალდებებით მთავრდება! სწორედაც რომ, - "რევოლუციებს გეგმავენ გენიოსები, ასრულებენ ჯალათები და სარგებლობენ არამზადები", - საქმე ის არის, ვინ სად იპოვის თავის ადგილს ამ ჩამონათვალში! თუმცა, მთავარი მამოძრავებელი ძალა, - ხალხი, როგორც წესი წაგებული რჩება!.. ამიტომ, - "ძირს სისხლიანი რევოლუციები, გაუმარჯოს მშვიდობიან ევოლუციებს"!!..

ჯუმბერ კირვალიძე,

პოლიტოლოგი