დღეს „მემარცხენე ალიანსის“ ლიდერებმა „ევროკომისიის წარმომადგენლობას საქართველოში“ ვიზალიბერალიზაციის თაობაზე მიმართვა გადასცეს. ისინი იმედოვნებენ, რომ ევროკომისია ვიზალიბერიზაციის მინიჭებასთან დაკავშირებით, საქართველოსთვის სამართლიან და ღირსეულ გადაწყვეტილებას მიიღებს.

„საქართველო ვიზალიბერალიზაციის მინიჭების მოლოდინშია. ქვეყანაში გატარებულ რეფორმებთან დაკავშირებით, ევროკომისიის დასკვნა ცნობილი 15 დეკემბერს გახდება. საქართველოსა და ევროკავშირს შორის სავიზო რეჟიმის გამარტივების თაობაზე დიალოგი 2012 წლის 4 ივნისს დაიწყო. 2013 წლის 25 თებერვალს საქართველოს ხელისუფლებას სავიზო რეჟიმის ლიბერალიზაციის სამოქმედო გეგმა გადაეცა და ქვეყანამ ყველა მოცემული საშინაო დავალება წარმატებით შეასრულა. კერძოდ, დოკუმენტების უსაფრთხოება (ბიომეტრული პასპორტების ჩათვლით), საზღვრის ინტეგრირებული მართვა, მიგრაციის მართვა და თავშესაფრის პოლიტიკა, საზოგადოებრივი წესრიგი და უსაფრთხოება, საგარეო ურთიერთობები და ადამიანის ძირითადი უფლებები.

საქართველოს მისწრაფება გახდეს ევროპული ოჯახის სრულფასოვანი წევრი მსოფლიოს ცივილიზებული სამყაროს წარმატებად მიგვაჩნია. ამ რთულ გზაზე, დამატებით გვინდა ხაზი გავუსვათ ევროკომისიის დადებითად მიღებული დასკვნის მნიშვნელობას, ვინაიდან ევროპარლამენტის და ევროპის საბჭოს გადაწყვეტილება ევროკომისიის დასკვნაზეა დამოკიდებული.

ვიმედოვნებთ, ევროკომისიაში მივლინებული საქართველოს მეგობარი და სტრატეგიული პარტნიორი ქვეყნების წარმომადგენლები ვიზალიბერიზაციის მინიჭებასთან დაკავშირებით, ჩვენი ქვეყნებისთვის შესაფერის სამართლიან და ღირსეულ გადაწყვეტილებას მიიღებთ“ – ნათქვამია „მემარცხენე ალიანსის“ მიმართვაში.