მთავრობის ადმინისტრაციაში, პრემიერ-მინისტრ ირაკლი ღარიბაშვილის ხელმძღვანელობით, მთის განვითარების ეროვნული საბჭოს სხდომა მიმდინარეობს.

როგორც სხდომის დაწყებამდე, საბჭოს წევრმა, საპარლამენტო უმრავლესობის წარმომადგენელმა ზაქარია ქუცნაშვილმა განაცხადა, "მაღალმთიანი რეგიონების განვითარების კანონი", რომელშიც საგადასახადო და სოციალური შეღავათებია განსაზღვრული, ძალაში 2016 წლის 1-ელ იანვარს შევა.

"დღეს მთის განვითარების საბჭო განიხილავს კონკრეტულად იმ კრიტერიუმებს, რომლის მიხედვითაც უნდა დასახელდეს, თუ რომელი დასახლებული პუნქტები შევა მაღალმთიან რეგიონებში. ასევე მთის საბჭო განიხილავს იმ სფეროებს, სადაც უნდა გავრცელდეს საგადასახადო შეღავათები", - განაცხადა ქუცნაშვილმა და დასძინა, რომ მთავრობას საკმაოდ კარგი ვარიანტი აქვს შემუშავებული.

რაც შეეხება კონკრეტულ შეღავათებს, ქუცნაშვილის თქმით, კანონით დადგენილია სოციალური შეღავათები, ასევე ექიმებისა და პედაგოგებისთვის ხელფასების გაზრდა. გარდა ამისა, მაღალმთიან რეგიონებში მცხოვრებ პენსიონერებს პენსიები 216 ლარამდე გაეზრდებათ. მაღალმთიან რეგიონებში მცხოვრებლებისთვის შემოღებული იქნება ასევე ელექტროენერგიის შეღავათი და გათბობის სპეციალური პროგრამა.

"ოპოზიცია დაგვჩხაოდა და ითხოვდა, რომ 50 ლარით გაგვეზარდა პენსია, თუმცა მომავალ წელს, მაღალმთიან რეგიონები, ჯამურად ის 56 ლარით გაიზრდება და 216 ლარს შეადგენს", - განაცხადა ქუცნაშვილმა.

კითხვაზე, განიხილება თუ არა მთის მინისტრის თანამდებობის შემოღების საკითხი, დეპუტატის თქმით, აღნიშნული თემა დღევანდელი სხდომის დღის წესრიგში არ დგას.