"ეს ძალიან სერიოზული ბრალდებაა და ამას მტკიცება უნდა. შესაძლოა, ვინმე ვინმეს გულშემატკივრობდეს, მაგრამ თუ ამას ანგარებითი მოტივაცია ექნება, ეს სისხლის სამართლის დანაშაულია", – აღნიშნული განცხადება საქართველოს პარლამენტის ადამიანის უფლებათა კომიტეტის თავმჯდომარის მოადგილემ გედევან ფოფხაძემ პორტალ „კვირას“ პრესკლუბში ალეკო ელისაშვილის ბრალდების საპასუხოდ გააკეთა.


„ შეწყალების თემა ძალიან ფაქიზია და მეტი სიფრთხილე გვმართებს. ამით შეიძლება თავად ინსტიტუცია დაზარალდეს. თუ ვინმეს ანგარებით შეწყალება ხდებოდა, გამოდის, რომ შეწყალების სტანდარტი არ არსებობს. თუ სტანდარტი არ არის, ეს სისტემას აზარალებს. კორუფციული გარიგებები იყო თუ არა, ეს უნდა დადასტურდეს. ეჭვები და ვარაუდები პოლიტიკოსების მიმართ და, მით უმეტეს, იმ ადამიანთა მიმართ, რომლებიც მსგავს საკითხებში არიან ჩართულები, ყოველთვის გამოითქმება. ეს ძალიან სერიოზული ბრალდებაა და ამას მტკიცება უნდა. შესაძლოა, ვინმე ვინმეს გულშემატკივრობდეს, მაგრამ თუ ამას ანგარებითი მოტივაცია ექნება, ეს სისხლის სამართლის დანაშაულია. მაშინ, როდესაც ალეკო ელისაშვილი კომისიის თავმჯდომარე იყო, მასთან არანაირი კომუნიკაცია არ მქონია და არაფერი მითქვამს, მაგრამ თეორიულად დავუშვათ, როდესაც პატიმრებთან დავდიოდი, მე რომ მენახა რომელიმე პატიმარი, რომელიც მძიმე მდგომარეობაშია და არანაირი სამართლებრივი რეჟიმი, გარდა შეწყალებისა, მის ამ მდგომარეობას არ შეცვლის, და ამის შესახებ წერილობით ან სიტყვიერად მიმემართა ალეკოსთვის, ამაში დასაძრახი ან სისხლის სამართლის დანაშაული რა არის? ხოლო თუ პირობითად იმიტომ მივმართე, რომ ამაში თანხა ავიღე, ეს უნდა დამტკიცდეს. ეს ძალიან სერიოზული ბრალდებაა“, – აცხადებს გედევან ფოფხაძე.