უკრაინის პრეზიდენტი, პეტრო პოროშენკო რეფორმების ნაციონალურ საბჭოზე შინაგან საქმეთა მინისტრ არსენ ავაკოვსა და ოდესის გუბერნატორ მიხეილ სააკაშვილს შორის მომხდარ ინციდენტს „სამარცხვინოს“ უწოდებს.


„ამ საკითხზე დისკუსია ხშირად ძალზე მწვავეა. არის აზრთა სხვადასხვაობა. ხდება პოზიციების შეჯერება, რაც რეფორმების განხორციელებას ხელს უწყობს. ამასთანავე, ამ საბჭოში ჩხუბი და უწმაწური სიტყვები ყოვლად დაუშვებელია, განსაკუთრებით მაშინ, როდესაც ის ადამიანის ეროვნებას ეხება, პიროვნების პატრიოტიზმს ეჭვქვეშ აყენებს და ისმის შეძახილები: „წაეთრიე უკრაინიდან“, განაცხადა პოროშენკომ.


პოროშენკოს თქმით, რეფორმატორების გუნდი უკრაინაში სწორედ მან მიიწვია. ამასთანავე, კორუფციასთან ბრძოლა შიუბიზნესის დარგი არ არის და მას არ სურს, რომ დეპუტატები და სახელმწიფო მოხელეები ამ სპექტაკლებში მონაწილეობდნენ. „ანტიკორუფციული შოუებიდან ანტიკორუფციულ საქმეებზე უნდა გადავიდეთ“, – აცხადებს პოროშენკო.


მისი თქმით, ამ საკითხში ლამაზი საუბარი კი არ არის საჭირო, არამედ – მტკიცებულებების წარდგენა ეროვნულ ანტიკორუფციულ ბიუროში.


ინციდენტი რამდენიმე დღის წინათ მოხდა.  სააკაშვილმა ავაკოვს კორუმპირებული უწოდა, ხოლო შს მინისტრმა ოდესის გუბერნატორს სახეში წყალი შეასხა.