"არც ნდობა მაქვს სასამართლოს მიმართ და არც პატივისცემა" - ამის შესახებ ე. წ. ნავთლუღის სპეცოპერაციის საქმეზე ბრალდებულმა, თავდაცვის ყოფილმა მინისტრმა, ბაჩო ახალაიამ დღეს სასამართლო პროცესზე განაცხადა.

ახალაიას განცხადებით, მოსამართლე, მზია ლომთათიძე საშუალებას არ აძლევს სამართალი გამოარკვიოს.

"თუ არ მოგვეცა მტკიცებულებების გამოკვლევის, მოწმეთა დაკითხვის საშუალება, ჩვენს აქ ყოფნას აზრი არ აქვს, რადგან თქვენ გვისპობთ ყველანაირ საშუალებას, დავადგინოთ სიმართლე. ეს იწვევს სასამართლოს მიმართ უნდობლობას. ამ ყველაფრიდან გამომდინარე, ბუნებრივია, ალბათ, თქვენი აცილების საკითხი უნდა დამეყენებინა, მაგრამ ასე არ ვაკეთებ. ვინაიდან აცილებას აზრი არ აქვს, რადგან თქვენ თუ არა, სხვა მოსამართლე იქნება და თქვენ ყველა, ერთი სისტემის ნაწილი ხართ. მე არც ნდობა მაქვს სასამართლოს მიმართ და არც პატივისცემა, რადგან ამის საშუალებას არ მაძლევთ. სასამართლო უბრუნდება შევარდნაძისდროინდელ ძველ ბუნებრივ მდგომარეობას, როცა გამეფებული იყო კორუფცია, რომ ჩვენ ვზრუნავდით, მოსამართლეებს ფული არ აეღოთ და გვეგონა ეს ყველაფერი დავასრულეთ. თუმცა, როგორც ჩანს, პროცესი უბრალოდ შევაჩერეთ და ახლა თქვენ ძველ, ბუნებრივ მდგომარეობას უბრუნდებით. ლენინმა თქვა, ახალი ადამიანის შექმნა შეუძლებელიაო და როგორც ჩანს, მართლაც ასეა. სასამართლო კორუმპირებულია და სასამართლო წარმოადგენს მხარეს. თუმცა, სასამართლომ რა გადაწყვეტილებაც არ უნდა მიიღოს,  სიმართლის დასაცავად ბოლომდე ვიბრძოლებ" - აღნიშნა თავდაცვის ყოფილმა მინისტრმა.