"მემარცხენე ალიანსის" პოლიტიკური მდივნი პაატა ჯიბლაძე ვლადიმერ პუტინის განცხადებასთან დაკავშირებით საქართველოს პრემიერ-მინისტრსა და პარლამენტის თავმჯდომარეს მიმართავს.


"რუსეთის ფედერაციის პრეზიდენტის, ვლადიმერ პუტინის განცხადება, რომელიც შეეხებოდა სავიზო რეჟიმის გაუქმებასა და საქართველოს ტერიტორიული მთლიანობის აღდგენის საკითხებს, ორ ქვეყანას შორის მრავალწლიანი დაძაბული ურთიერთობის ნორმალიზების მცდელობას ნიშნავს", _ ამის შესახებ "მემარცხენე ალიანსის" პოლიტიკურმა მდივანმა პაატა ჯიბლაძემ დღეს, პარტიის ოფისში გამართულ ბრიფინგზე განაცხადა.


პაატა ჯიბლაძის თქმით, სავიზო რეჟიმის გაუქმებით აღსდგება ორ მეზობელ ერს შორის მეგობრული ურთიერთობა, გაძლიერდება ბიზნეს კავშირები და რუსეთში მცხოვრები მილიონი თანამემამულესთვის სახლში დასაბრუნებლად ხელოვნურად შექმნილი ბარიერები მოიხსნება.

"პრეზიდენტ პუტინის განცხადება საქართველოს ტერიტორიული მთლიანობის აღდგენის თაობაზე ნიშნავს, რომ ჩრდილოელი მეზობლისთვის ეს საკითხი ტაბუდადებული არ არის და თანმიმდევრული, ეროვნული პოლიტიკით შესაძლებელია დადებითი შედეგის მიღწევა. მოვუწოდებთ ქვეყნის პრემიერ- მინისტრსა და საქართველოს პარლამენტის თავმჯდომარეს, გამოიყენონ შექმნილი პოლიტიკური სიტუაცია და დაუყოვნებლივ დაიწყონ მოლაპარაკებები ჩვენი სამშობლოს გამთლიანების მიზნით", _ განაცხადა ჯიბლაძემ.


პაატა ჯიბლაძემ შეახსენა საზოგადოებას, რომ "მემარცხენე ალიანსის" ლიდერებმა გაზაფხულზე საქართველოს პრეზიდენტს მოუწოდეს, დაუყოვნებლივ დაეწყო მოლაპარაკებები რუსეთის პრეზიდენტთან. "სამწუხაროდ მან გამოიჩინა სისუსტე, აჰყვა რიგი პოლიტიკური პარტიების პროვოკაციულ, არასახელმწიფოებრივ მოწოდებებს, რომ რუსეთის ხელმძღვანელობასთან ნებისმიერი კონტაქტი ჩაითვლებოდა ქვეყნის ღალატად, რის გამოც დაიკარგა ძვირფასი დრო", _ განაცხადა "მემარცხენე ალიანსის" პოლიტიკურმა მდივანმა.