საქართველოს პრემიერ-მინისტრმა ირაკლი ღარიბაშვილმა დღეს მთავრობის სამწლიანი საქმიანობის ანგარიშის წარდგენისას განაცხადა, რომ "შრომის პროცესი არ არის სენსაცია" და "ის ყოველთვის არ ხვდება ნიუსებში. ხშირად თვით შრომის შედეგებიც არ ხვდება მედიაში". მისი თქმით, საქართველოს ჰყავდა "სატელევიზიო მითებზე დაფუძნებული ხელისუფლება", მაგრამ "ქართული საზოგადოება აღარაა თანახმა ილუზიებში იცხოვროს".

“ყველას გვინდა კარგად ვცხოვრობდეთ დღესვე, მაგრამ ყველაზე მეტად გვინდა, რომ ჩვენ მიერ გამოვლილი განსაცდელებისა და ტრაგედიებისგან დავაზღვიოთ შვილები, უზრუნველვყოთ მათი მომავალი. გავძლიერდეთ რეალურად, და არა ცხრილებსა თუ პროპაგანდისტულ კამპანიებში. შრომის პროცესი არ არის სენსაცია, ის ყოველთვის არ ხვდება ნიუსებში. ხშირად თვით შრომის შედეგებიც არ ხვდება მედიაში. რა თქმა უნდა ჩვენ გვახსოვს სატელევიზიო მითებზე დაფუძნებული ხელისუფლება. მაგრამ ქართული საზოგადოება აღარაა თანახმა ილუზიებში იცხოვროს. ჩემი დღევანდელი ანგარიშის უმთავრესი საგანი იყო შრომა - მევენახეთა თუ მეცნიერების, ბიზნესმენების თუ საჯარო მოხელეების... ამგვარი შრომა ნაბიჯ-ნაბიჯ, თანმიმდევრულად ქმნის ახალ რეალობას, რომელშიც არ რჩება ადგილი ილუზიებისთვის. მჯერა, რომ დღეს ჩვენი ხალხი ხედავს ამ რეალობას. რომ სწორი გზით მივდივართ ჩვენი და ჩვენი შვილების უკეთესი ხვალინდელი დღისკენ. ჩვენ ყველაფერს ვაკეთებთ იმისთვის, რომ ამ ხალხის საკადრისი ხელისუფლება ვიყოთ. აღჭურვილი ვართ რწმენითა და ენერგიით, მომავლის მკაფიო ხედვით. ჩვენ გუნდს ამოძრავებს ერთადერთი ამბიცია - რომ როდესაც წლების შემდეგ ჩვენ საქმეებს გაიხსენებენ, თქვან, რომ ყველაფერი გავაკეთეთ დიდი ნდობისა და პატივის გასამართლებლად, ჩვენი ნიჭიერი, ღირსეული ხალხის თავდაუზოგავი მსახურებისთვის,” განაცხადა პრემიერ-მინისტრმა.