ირაკლი ღარიბაშვილის მიერ პრემიერ-მინისტრის პოსტის შესაძლო დატოვების შესახებ გავრცელებულ ინფორმაციასთან დაკავშირებით, ექსპერტი, გია ხუხაშვილი შეფასებების გაკეთებისგან თავს იკავებს.

როგორც ხუხაშვილმა guardian.ge-სთან საუბარში აღნიშნა არ სურს დაუდასტურებელ ინფორმაციაზე მოსაზრება გამოთქვას.

„ეს ჯერჯერობით დაუდასტურებელი ინფორმაციაა და ამიტომ თავს შევიკავებ ჩემი მოსაზრების გამოთქმისგან. არც იმის თქმა შემიძლია, რამდენად დიდია ალბათობა მსგავსი ცვლილებების განხორციელებისა. მოდი, დაველოდოთ დღის ბოლოს. თუ დადასტურდება აღნიშნული, მერე გაკეთდება შეფასებებიც“ - აღნიშნა ხუხაშვილმა.

ტელეკომპანია „იმედთან“ საუბრისას კი გია ხუხაშვილმა ვიცე-პრემიერ გიორგი კვირიკაშვილთან დაკავშირებით შეფასებები გააკეთა. გავრცელებული ინფორმაციით, პრემიერის პოსტს სწორედ კვირიკაშვილი დაიკავებს. ექსპერტის თქმით, ვიცე-პრემიერი ხელისუფლებაში ერთ-ერთი გამორჩეული ფიგურაა.

„გიორგი ძალიან კარგი და წესიერი ადამიანია. მას აქვს ზრდის პოტენციალი. ის ღირსეული ადამიანია, თუნდაც იმიტომ, რომ კვირიკაშვილი სხვადასხვა მწვავე საკითხებზე ყოველთვის ცდილობდა რომ ყოფილიყო ძალიან კორექტული. მას ყოველთვის ჰქონდა განსხვავებული აზრი და არასდროს ფეხის ხმას არ აჰყოლია“- აღნიშნა ექსპერტმა ტელეკომპანიასთან საუბრისას.

პრემიერ-მინისტრის შესაძლო გადადგომის თაობაზე დილიდან ვრცელდება მედიაში ინფორმაცია. სხვადასხვა სააგენტოები წერენ, რომ აღნიშნულ პოსტს დროებით, ვიცე-პრემიერი, გიორგი კვირიკაშვილი დაიკავებს. ეს სამთავრობო ცვლილებები კი ექს-პრემიერ ბიძინა ივანიშვილთან უკვე შეთანხმებულია.

გავრცელებულ ინფორმაციას მთავრობის ადმინისტრაცია არ ადასტურებს, თუმცა, არაოფიციალური ცნობით, ღარიბაშვილი პოსტის დატოვების შესახებ განცხადებას სწორედ დღეს გააკეთებს.