„სკამი მუდმივი არ არის, თუმცა, ამ შემთხვევაში ყველაფერი ქვეყნის ახალ პრემიერზეა დამოკიდებული“ - ამის შესახებ guardian.ge-სთან საუბარში, სამეგრელო-ზემო სვანეთის გუბერნატორმა, ლევან შონიამ გუბერნიებში განსახორციელებელ შესაძლო საკადრო ცვლილებებზე კომენტირებისას განაცხადა.


გუბერნატორის თქმით, მისი თანამდებობაზე დარჩენა-არდარჩენის საკითხი მხოლოდ ახალი პრემიერის პრეროგატივაა. „ამ ეტაპზე, ვრჩები ჩემს თანამდებობაზე, ველოდები ახალი პრემიერის და ახალი მთავრობის დამტკიცებას. სწორედ ამის შემდეგ გაირკვევა ყველაფერი” - აღნიშნა ლევან შონიამ.


guardian.ge-სთან მოსალოდნელ საკადრო ცვლილებებთან დაკავშირებით ისაუბრა მთავრობის ადმინისტრაციის რეგიონებსა და ადგილობრივ თვითმმართველობის ორგანოებთან ურთიერთობის დეპარტამენტის თავმჯდომარემ, გიორგი ამაშუკელმაც.


ამაშუკელის თქმით, პრემიერი გადაწყვეტს დარჩება თუ არა პოსტზე, თავად საკუთარი სურვილით თანამდებობის დატოვებას კი არ გეგმავს.


„საკადრო ცვლილებებთან დაკავშირებული განხილვები ჯერჯერობით არ გვქონია. თუმცა, ეს იმას არ ნიშნავს, რომ ეს ცვლილებები შეიძლება არ განხორციელდეს. უბრალოდ, ველოდებით ქვეყნის ახალი პრემიერ-მინისტრის დამტკიცებას. მთავრობის ახალი მეთაური გადაწყვეტს შემდგომ ვინ დატოვოს და ვინ გაუშვას“ - განმარტა ამაშუკელმა.


აღნიშნული საკადრო ცვლილებების განხორციელებაზე მას შემდეგ გავრცელდა ინფორმაცია, რაც ირაკლი ღარიბაშვილმა პრემიერ მინისტრის თანამდებობა დატოვა. არ გამოირიცხება, რომ რამდენიმე მინისტრთან ერთად გუბერნატორების იმ ნაწილსაც მოუწიოთ პოსტებიდან წასვლა, ვინც უშუალოდ ღარიბაშვილის კადრებად მოიაზრებიან. ესენი არიან კახეთის გუბერნატორი ირაკლი შიოლაშვილი, რაჭა-ლეჩხუმ-ქვემო სვანეთის გუბერნატორი პარმენ მარგველიძე, გურიის გუბერნატორი გია სალუქვაძე, სამეგრელო-ზემო სვანეთის გუბერნატორი ლევან შონია.


რაც შეეხება მთავრობის ადმინისტრაციის რეგიონებსა და ადგილობრივ თვითმმართველობის ორგანოებთან ურთიერთობის დეპარტამენტის თავმჯდომარეს გიორგი ამაშუკელს, ისიც ასევე ღარიბაშვილის უშუალო კადრია და მან მთავრობის ადმინისტრაციაში გაზაფხულზე, რეგიონული განვითარებისა და ინფრასტრუქტურის მინისტრის პირველი მოადგილის პოსტის დატოვების შემდეგ გადაინაცვლა.