პრემიერ მინისტრობის კანდიდატი და მინისტრთა კაბინეტის წევრობის კანდიდატები ამ წუთებში ქუთაისში პარლამენტში უმცირესობის წარმომადგენლებს ხვდებიან. ტრიბუნაზე სიტყვით, "ერთიანი ნაციონალური მოძრაობის" ერთ-ერთი ლიდერი გოკა გაბაშვილი გამოდის. მან გიორგი კვირიკაშვილს მიმართა და განაცხადა, რომ მის ადგილას ახლა ტრიბუნასთან ბიძინა ივანიშვილი უნდა იდგეს.



"ჩვენ რომ ნორმალური ქვეყანა ვიყოთ ბატონო გიორგი, აქ უნდა იდგეს, ამ ტრიბუნასთან ბიძინა ივანიშვილი, რომელიც რეალურად იღებს გადაწყვეტილებებს ჩემი აზრით და აბსოლუტური უმეტესობის აზრით, ის არის რეალური მმართველი ამ ქვეყნისა. სწორედ მან მიღო გადაწყვეტილება წინა პრემიერის მოხსნაზე და იმდენად სწრაფად, რომ დროც კი არ დაუტოვა მიზეზების მოსაფიქრებლად, თუ რა უნდა ეთქვა საზოგადოებისთვის. მანვე მიიღო სასწრაფოდ გადაწყვეტილება თქვენს დანიშვნაზე და ასევე არ მოგცათ დრო დაფიქრებულიყავით საკადრო საკითხებზე. თქვენ თვლით, რომ გჭირდებათ დრო იმისათვის, რომ მინისტრები გაიცნოთ. ალბათ არ მოელოდებით, რომ ჩვენ ამას სერიოზულად აღვიქვამთ, რომ თქვენ გჭირდებათ თვეები, რომ მაგალითად გაიცნოთ ბატონი ხადურის მუშაობის შედეგები.თქვენ იყავით ეკონომიკის მინისტრი და სწორედ ამ პერიოდში საქართველოს ეკონომიკა შემცირდა, ლარი გაუფასურდა, სიღარიბე გაიზარდა და აქედან გამომდინარე მინდა გკითხოთ - იზიარებთ, თუ არა ივანიშვილის განცხადებას რომ მოსახლეობამ ბანკირები დაიქირაოს თუ განსხვავებული მიდგომა გაქვთ?! აპირებთ თუ არა ეკონომიკური პოლიტიკის შეცვლას?!"განაცხადა გოკა გაბაშვილმა.