კოალიცია "ქართული ოცნების" კანდიდატი გარდაბნის მინიციპალიტეტის გამგებლის რიგგარეშე არჩევნებში ვეტერანი ფეხბურთელი, ეროვნული ნაკრების ყოფილი ნახევარმცველი გოჩა ჯამარაულია. ჯამარაული უკვე დარეგისტრირდა გარდაბნის # 21-ე საარჩევნი ოლქში. აღნიშნული ინფორმაცია guardian.ge-ს გარდაბნის #21-ე საოლქო საარჩევნო კომისიის თავმჯდომარემ, რამაზ ბუდაღაშვილმა დაუდასტურა.

ის, რომ კოალიცია "ქართული ოცნება" გარდაბანში გამგებლის არჩევნებში თავის კანდიდატად გოჩა ჯამარაულს წარადგენდა, guardian.ge-სთვის ექსკლუზიურად ცნობილი გუშინ გახდა.რამაზ ბუდაღაშვილის ინფორმაციით, „თავისუფალ დემოკრატებს“ კანდიდატურა ჯერ არ წარუდგენიათ. „ერთიანი ნაციონალური მოძრაობის“ გარდაბნის მუნიციპალიტეტის გამგებლობის კანდიდატი კი ბესიკ კახაბრიშვილია.

როგორც ცესკო-ში guardian.ge-ს განუცხადეს, 2016 წლის 28 იანვრის არჩევნებში სულ დარეგისტრირდა სამი პოლიტიკური პარტია, ესენია: კოალიცია „ქართული ოცნება“, „ერთიანი ნაციონალური მოძრაობა“ და „თავისუფალი დემოკრატები“. აღნიშნულ პარტიებს კანდიდატურების წარდგენის ვადა 29 დეკემბრის 00:00 საათამდე აქვთ. საქართველოს პრეზიდენტის 2015 წლის 9 დეკემბრის N09/12/01 განკარგულების საფუძველზე, გარდაბანში გამგებლის რიგგარეშე არჩევნები 2016 წლის 28 იანვარს გაიმართება.

რიგგარეშე არჩევნების დანიშვნა, გარდაბნის პირდაპირი წესით არჩეული გამგებლის, გარსევან ნიორაძის გარდაცვალებამ განაპირობა. კანონის მიხედვით, რიგგარეშე არჩევნებში გამგებელი შესაბამისი მუნიციპალიტეტის საკრებულოს უფლებამოსილების დარჩენილი ვადით აირჩევა.