„ბატონო გივი, სწორად ვერ მოგაწოდეთ ინფორმაცია, თორე თქვენ გაიგებდით. არ მინდოდა ციფრებით მანიპულირება და გითხარით, რომ ყაჩაღობის ნაწილში, შარშანდელთან შედარებით, რამოდენიმე ერთეულით არის გაზრდილი შემთხვევები“ - ასე გამოეხმაურა საქართველოს შინაგან სქმეთა მინისტრი, გიორგი მღებრიშვილი „ერთიანი ნაციონალური მოძრაობის“ წარმომადგენლის, გივი თარგამაძის შეკითხვას დანაშაულის სტატისტიკასთან დაკავშირებით. 

„საუბარი იყო სტატისტიკის გაყალბებაზე. მე შემიძლიათ ძველი პერიოდის ციფრებიც გითხრათ. 2008 წელს, 1008 ყაჩაღობის ფაქტია ოფიციალურად დარეგისტრირებული, 2009 წელს - 700, წელს არის დარეგისტრირებული 317 საიდანაც 202 გახსნილია. თითოეულ ციფრზე თქვენ პასუხისმგებელ პირს ვეძებ, მე ვარ პასუხისმგებელი ამ ციფრებზე - ეს არის ოფიციალური სტატისტიკა“ - აღნიშნა გიორგი მღებრიშვილმა.

მინისტრი ასევე ვაკეში გახსნილ ყაჩაღობის ფაქტს გამოეხმაურა და აღნიშნა, რომ შსს-ს თანამშრომლებმა სიცოცხლისა და ჯანმრთელობის ფასად, დამნაშავე დაიჭირეს. აღნიშნულის გამო, მღებრიშვილმა შსს-ს თანამშრომლებს მადლობა გადაუხადა.

ენმ-ის წარმომადგენელი, გივი თარგამაძე კი ამბობდა, რომ დანაშაულის სტატისტიკა შს მინისტრის განცხადებით, არასწორი იყო.

"გუშინ შინაგან საქმეთა მინისტრმა აღიარა, რომ უწყების წარმოდგენილი სტატისტიკა არ არის სწორი და მძიმე დანაშაულმა იმატა, და მართლაც, დადასტურება დღეს დილითვე მივიღეთ, როდესაც ქალაქის ცენტრში, გეგეშიძის ბაღში ორმხრივი სროლა გაიმართა პოლიციელებსა და დამნაშავეებს შორის ბანკის დაყაჩაღების მცდელობისას" - აღნიშნული განცხადება თარგამაძემ პარლამენტის პლენარულ სხდომაზე გააკეთა.