გიორგი კვირიკაშვილმა პარლამენტის პლენარულ სხდომაზე დეპუტატების მიერ დასმულ შეკითხვებზე პასუხის გაცემისას, კომპანია "ატუსთან" დაკავშირებით "ნაციონალური მოძრაობის" წარმომადგენლის მიერ დასმულ შეკითხვასაც უპასუხა. მან ტრიბუნაზე წარმოადგინა დოკუმენტი, რომელიც 2008-2012 წლებში გაცემულ ლიცენზიებს შეეხება. მისი თქმით, ეს პროცესი 2015 წლამდე გაგრძელდა. როგორც კვირიკაშვილმა აღნიშნა, კომპანია "ატუს" არც ერთი თეთრი მოგება არ უშოვია განხორციელებული პროექტებიდან და მისი საქმიანობა მთლიანად საქველმოქმედო ხასიათისაა.


"ეს კომპანია ახორციელებს საქველმოქმედო პროექტებს. ეს არის წმინდაწყლის საქველმოქმედო ორგანიზაცია, 100 პროცენტით საქველმოქმედო ორგანიზაცია და მის ხე-ტყის მოპოვების უფლებას აქვს მხოლოდ და მხოლოდ ერთი დანიშნულება, რომ საავადმყოფოების, თეატრების და სხვა საზოგადოებრივი ობიექტების მშენებლობა და რეაბილიტაცია განახორციელოს. მერქნული რესურსი, რომელიც ამ კომპანიის მიერ მოიპოვება, გამოიყენება მიწისძვრით დაზარალებული მოსახლეობისთვის საცხოვრებლების რეაბილიტაციისთვის, რაგბის ბაზების მშენებლობებისთვის - ქუთაისში, ბათუმში და ფოთში - სკოლების და სხვა ამ  ტიპის დანიშნულების ობიექტების მშენებლობისას. არც ერთი კუბური მეტრი ლიცენზიის საფუძველზე მოპოვებული ხე-ტყიდან, არ გამოიყენება კომერციული დანიშნულებისთვის", განაცხადა გიორგი კვირიკაშვილმა და დაამატა, რომ ამ შეკითხვის ავტორს კარგად უნდა მოეხსენებოდეს ის, რომ წინა ხელისუფლების დროს ამგვარი ლიცენზია კომპანიისთვის 4-ჯერ იყო გაცემული.