ამერიკის შეერთებული შტატები საქართველოს მიმართ დამატებითი დახმარების თაობაზე გადაწყვეტილებას იღებს. როგორც სახელმწიფო მდივანმა ჯონ კერიმ აშშ-საქართველოს სტრატეგიული პარტნიორობის კომისიის პლენარულ სხდომაზე განაცხადა, ეს გულისხმობს როგორც ევროატლანტიკური მიმართულებით სვლაში, ისე ეკონომიკური რეფორმების განხორციელების, ინვესტიციების მოზიდვის კუთხით და სხვ. მიმართულებით დახმარებას.

"დღეს მე განვაცხადებ აშშ-ის სურვილს და ნებას, დაეხმაროს და მხარი დაუჭიროს საქართველოს ევროატლანტიკური ინტეგრაციისაკენ სწრაფვაში, კონკრეტულად კი დაეხმაროს, რომ საქართველომ მიაღწიოს ევროპასთან უვიზო რეჟიმის შემოღებას და მინიმუმამდე შეამციროს ოკუპირებული ტერიტორიების გასწვრივ ე.წ. ბორდერიზაციით მიყენებული ზიანი. შეერთებული შტატები ასევე მზადყოფნას გამოთქვამს, ვაჭრობის სფეროში უფრო გაძლიერებულ რეჟიმში ითანამშრომლოს საქართველოსთან", - განაცხადა ჯონ კერიმ.

აშშ-ის სახელმწიფო მდივნის განმარტებით, საქართველო მოიაზრება როგორც ვაჭრობის რეგიონული ცენტრი, რომელიც ინფრასტრუქტურის უზრუნველყოფის და რეგიონული თანამშრომლობის გარანტი იქნება.

შეერთებული შტატების მთავარი დიპლომატი საქართველოს ნატოში ინტეგრაციის საკითხსაც შეეხო და განაცხადა, რომ "ბუქარესტის გადაწყვეტილება და ყველა შემდეგი გადაწყვეტილება ხელს შეუწყობს საქართველოს საბოლოოდ გაწევრიანებას ნატოში. საქართველოს მიღწევებს აუცილებლად აღიარებს ორგანიზაციის ყველა წევრი სამიტზე", - აღნიშნა აშშ-ის სახელმწიფო მდივანმა, რომელმაც თავის გამოსვლაში ავღანეთში ქართველი სამხედროების წვლილზეც ისაუბრა და თქვა, რომ შეერთებული შტატები დაჭრილ ქართველ სამხედროებზე ზრუნვას მომავალშიც განაგრძობს.