ბიძინა ივანიშვილი დღეს საღამო GDS -ის ეთერში სამთავრობო ცვლილებებზე ისაუბრებს და ღარიბაშვილის და ახალი პრემიერ მინისტრის მიმართ თავის მოსაზრებებს გამოთქვამს.

ანონსში, რომელიც ახლახან გავრცელდა ივანიშვილი ღარიბაშვილზე ამბობს, რომ „მას არაფერი დაუშავებია, გაუფუჭებია. ირაკლი ღარიბაშვილი წავიდა წარმატებული პრემიერი. მას შეუძლია თავისუფლად ჩამოაყალიბოს ახალი პოლიტიკური გუნდი,“ განაცხადა ბიძინა ივანიშვილმა.

გიორგი კვირიკაშვილზე კი ივანიშვილი ამბობს, რომ „კარგი პერსპექტივა აქვს მას, რომ დაეხმაროს საკუთარ ქვეყანას. ეს იყო საფუძველი იმისა, რომ გიორგიზე გაკთებულიყო არჩევანი“. 

მთავრობაში სამომავლო საკადრო ცვლილებების შესახებ დასმულ შეკითხვაზე ბიძინა ივანიშვილი პასუხობს: „გუნდი ყოველთვის საჭიროებს კორექტირებას. პროცესს ვერ ასცდება ვერც კვირიკაშვილი“.

იუსტიციის უმაღლესი საბჭოს მიერ მიღებულ გადაწყვეტილებასთან დაკავშირებით, რომელიც ლევან მურუსიძის სააპელაციო სასამართლოს მოსამართლედ ხმათა აბსოლუტური უმრავლესობით არჩევას უკავშირდება, ბიძინა ივანიშვილი ასე აფასებს: „არ უნდა ჩაერიოს ხელისუფლების არც ერთი შტო სასამართლოს მმართველობაში. გირგვლიანის თემა იყო განსაკუთრებული, რა თქმა უნდა ძალიან ტრაგიკული, ქალბატონი ენუქიძის განსაკუთრებით, დედა, წინააღმდეგობის სიმბოლოდ ჩამოყალიბდა ეს ქალბატონი ჩემშიც და ყველა მოქალაქეში“, აღნიშნა ბიძინა ივანიშვილმა. 

ჩაერევა თუ არა 2016 წლის საპარლამენტო არჩევნებზე საარჩევნო სიების შედგენაში, ივანიშვილი პასუხობს: „ძალიან აქტიურად ჩავერევი, კიდევ ერთჯერ ვაცხადებ, მთელი ჩემი რესურსით დავეხმარები საკუთარ გუნდს,“ განაცხადა ივანიშვილმა და შეკითხვაზე: „შეინარჩუნებს თუ არა კოალიცია ერთიანობას მომავალ საპარლამენტო არჩევნებზე“ ასე პასუხობს:  „კოალიცია ერთად თუ ცალ-ცალკე განწირულია მოგებისთვის“.