ბიძინა ივანიშვილმა ცოტა ხნის წინათ GDS -ის ეთერში ირაკლი ღარიბაშვილის მომავალ კარიერასთან დასმული შეკითხვის საპასუხოდ, რომელიც გავრცელებულ ინფორმაციას ეფუძნება იმასთან დაკავშირებით, რომ შესაძლებელია მან ეროვნული ბანკის პრეზიდენტის პოსტი დაიკავოს, განაცხადა, რომ ეს არ შეესაბამება სინამდვილეს, რადგან ღარიბაშვილისთვის, რომელიც უმაღლეს თანამდებობაზე მოღვაწეობდა, ეროვნული ბანკის პრეზიდენტობა არ იქნება მომხიბლავი თანამდებობა.

ივანიშვილმა ხაზი გაუსვა ღარიბაშვილთან ახლო ურთიერთობას და თქვა: „ჩემი კარი მუდამ ღია იქნება და შეუძლია გამოიყენოს ჩემი შესაძლებლობები, როგორც საკუთარი. ჩვენ ძალიან ახლო ურთიერთობა გვქონდა და გვაქვს დღესაც, ოჯახებით ვმეგობრობთ და ასე იქნება მომავალშიც“, აღნიშნა ივანიშვილმა და დაამატა, რომ მომავალი საქმიანობა ღარიბაშვილმა თვითონ უნდა გადაწყვიტოს.

ივანიშვილმა ასევე ღარიბაშვილთან გადადგომამდე წარმართული საუბრის გარკვეული შინაარსიც გააჟღერა, რომლის თანახმადაც თუ გუნდს გაუჭირდება იგი [ღარიბაშვილი] მზად არის გვერდში დაუდგეს და შესაძლოა ეს 2016 წლის არჩევნებშიც მოხდეს. „თუ სურვილი გაუჩნდება ირაკლის, გარწმუნებთ, რომ გუნდი მას სიხარულით დაიბრუნებს და მიიღებს. გარდა ამისა, თუ მას სურვილი გაუჩნდება არა ამ გუნდში, არამედ სხვა გუნდში, მას თავისუფლად შეუძლია ჩამოაყალიბოს ახალი პოლიტიკური გუნდი. მას ამის რესურსი გააჩნია და ეს არის ყველაზე საინტერესო“, განაცხადა ივანიშვილმა.