სამტრედიის მუნიციპალიტეტში ელექტრომომარაგების აღდგენისა და საავტომობილო გზების გაწმენდითი სამუშაოები მიმდინარეობს. დასავლეთ საქართველოში მთავრობის ადმინისტრაციის რეგიონებთან და ადგილობრივ თვითმმართველ ორგანოებთან ურთიერთობის დეპარტამენტის ხელმძღვანელი, გიორგი ამაშუკელი იმყოფება.


როგორც ამაშუკელმა guardian.ge-ს  განუცხადა, დასავლეთ საქართველოს რეგიონებში, დიდთოვლობით გამოწვეული შეფერხებების სალიკვიდაციო სამუშაოები ინტენსიურ რეჟიმში მიმდინარეობს.

 
ამაშუკელის ინფორმაციით, ყველაზე რთული მდგომარეობა გურიაში, სამეგრელოსა და იმერეთშია. მისივე თქმით, რეგიონებში მდგომარეობის გაუარესება არ არის მოსალოდნელი.

 
„ამჟამად, მიმდინარეობს გზების გაწმენდისა და ელექტრომომარაგების კუთხით ინტენსიური სამუშაოები ყველა რეგიონის პრობლემურ მინიციპალიტეტში. მხოლოდ ელექტროკომპანიის 400-მდე სამუშაო ჯგუფია გასული სხვადასხვა მუნიციპალიტეტში, რათა დროულად მოხდეს ელექტროენერგიის აღდგენა აბონენტებისთვის. მობილიზებულია სპეცტექნიკა და იწმინდება გზები. მოძრაობა შეფერხებულია მხოლოდ მუნიციპალიტეტების შიდა საუბნო გზებზე. ჩემი ინფორმაციით, უახლოესი დღეების ამინდის პროგნოზი დამაიმედებელია და შესაბამისად, მდგომარეობის გაუარესებას არ ველოდებით“ - აღნიშნა გიორგი ამაშუკელმა guardian.ge-სთან საუბრისას.


საქართველოს პრემიერ მინისტრის, გიორგი კვირიკაშვილის დავალებით, ამაშუკელის გარდა, ადგილებზე პრობლემების გადაწყვეტაში, ენერგეტიკის მინისტრის მოადგილე ილია ელოშვილია ჩართული. დღეს ისინი სამტრედიაში არსებულ მდგომარეობას იმერეთის გუბერნატორ გივი ჭიჭინაძესთან და სამტრედიის მუნიციპალიტეტის გამგებელ ვალერი ფოცხვერიასთან ერთად გაეცნენ.