5 იანვარს, ,,ქართული ოცნება-დემოკრატიულმა საქართველომ’’ გარდაბნის მუნიციპალიტეტში, გარდაბნის გამგებლობის კანდიდატად გოჩა ჯამარაული წარადგინა, - ამის შესახებ ინფორმაციას "ქართული ოცნების" პრეს-სამსახური ავრცელებს.
 

,,გვქონდა შეხვედრა გარდაბნის ადგილობრივ მოსახლეობასთან, პარტიის აქტივთან. საოლქო ორგანიზაციის კონფერენციის შედეგად ავირჩიეთ პარტიის საოლქო ორგანიზაციის თავმჯდომარე, ასევე წარვადგინეთ გარდაბნის გამგებლობის კანდიდატი ეს გახლავთ ბატონი გოჩა ჯამარაული. თქვენ იცით გოჩას კარიერა , ის წლების განმავლობაში სპორტით, ფეხბურთით იყო დაკავებული, საქართველოს ნაკრებში არაერთი თამაში აქვს ჩატარებული. სპორტის შემდეგ, საკმაოდ წარმატებულად ჩაერთო ბიზნესში . ის არის კარგი მენეჯერი და რაც მთავარია პატიოსანი ადამიანი თავისი განვლილი ცხოვრებით.


სამომავლოთ, ჩვენს გუნდთთან ერთად ვგეგმავთ გარდაბნის რაიონის და ადგილობრივი მოსახლეობის საკეთილდღეოდ არაერთი ღონიძიებების გატარებას.’’ - განაცხადა ,,ქართული ოცნება-დემოკრატიული საქართველოს’’ გენერალურმა მდივანმა კახა კალაძემ.


,,დღეს წარვადგინეთ კოალიცია ,,ქართული ოცნების’’ გარდაბნის გამგებლობის კანდიდატი.ეს კანდიდატი შეირჩა მისი პროფესიული უნარ-ჩვევების გამო, ის არის თავისი საქმის პროფესიონალი, სუფთა წარსულით რომელიც ნამდვილად გახდება გარდაბნელების რჩეული და ვფიქრობ ღირსეულად გაიმარჯვებს არჩევნებში.’’ - განაცხადა ,,ქართული ოცნება-დემოკრატიული საქართველოს’’ აღმასრულებელმა მდივანმა განაცხადა ირაკლი კობახიძემ.


გუშინ ,,ქართული ოცნება-დემოკრატიული საქართველოს“ გენერალურმა მდივანმა კახა კალაძემ და პარტიის აღმასრულებელმა მდივანმა ირაკლი კობახიძემ საოლქო ორგანიზაციების კონფერენცია გარდაბნის მუნიციპალიტეტში გახსნეს.


საქართველოს პრეზიდენტის 2015 წლის 9 დეკემბრის N09/12/01 განკარგულების საფუძველზე, გარდაბანში გამგებლის რიგგარეშე არჩევნები 2016 წლის 28 იანვარს გაიმართება.


რიგგარეშე არჩევნების დანიშვნა, გარდაბნის პირდაპირი წესით არჩეული გამგებლის, გარსევან ნიორაძის გარდაცვალებამ განაპირობა.


კანონის მიხედვით, რიგგარეშე არჩევნებში გამგებელი შესაბამისი მუნიციპალიტეტის საკრებულოს უფლებამოსილების დარჩენილი ვადით აირჩევა.