„მე ხელი მოვაწერე საარჩევნო კოდექსში ცვლილებებს, მე ვფიქრობ, რომ საუკეთესო არის პროპორციულ სისტემაზე ქვეყნის გადაყვანა“- ამის შესახებ საქართველოს პრეზიდენტმა, გიორგი მარგველაშვილმა ავლაბრის სასახლეში საგანგებო ბრიფინგზე განაცხადა.

"ეს ცვლილებები არანაირად არ არის ის საარჩევნო რეფორმა, რომელზეც ჩვენ წლებია ვსაუბრობთ. განსხვავება მდგომარეობს მხოლოდ იმაში რა ვადებია ამ პროექტის განხორციელების თვალსაზრისით. მთელი პოლიტიკური სპექტრი, არასამთავრობო ორგანიზაციები, ჩვენი საერთაშორისო პარტნიორები, მეტიც, საქართველოს მოსახლეობის 240 ათასზე მეტი ხელმოწერით დადასტურებული პეტიცია მხარს უჭერს იმ პოზიციას, რომ ეს განხორციელდეს 2016 წელსვე. განსხვავებული პოზიცია არის, როგორც ვხედავთ მმართველ კოალიციაში, რომელიც ამ ცვლილებას 2020 წლისთვის გეგმავს. მე ვფიქრობ, რატომ უნდა გადავდოთ ის, რაზეც ვთანხმდებით ყველა, რომ კარგია და მისაღებია, კიდევ 4 წლით, კიდევ უფრო გაუგებარია ჩემთვის. და მე მიმაჩნია და მოვუწოდებ ყველა პოლიტიკურ ძალას, რომ უფრო ინტენსიური კონსულტაციების მეშვეობით მივიდნენ ერთობლივ თანხმობამდე ამ საკითხთან დაკავშირებით.“ - განმარტა პრეზიდენტმა.

შეკითხვაზე, თუ კი ეს კანონი არ არის ის, რაც საზოგადოების მოთხოვნებს აკმაყოფილებს, რატომ არ გამოიყენა ვეტოს უფლება, პრეზიდენტმა უპასუხა: "იმიტომ, რომ ეს კანონი ასრულებს იმ მოთხოვნებს, რომელიც საკონსტიტუციო სასამართლოს მიერ იქნა წარმოდგენილი - გარკვეულ ტექნიკურ ჩასწორებებს არსებულ კოდექსში. ეს არის სწორად დაწერილი კანონი, იმ მოთხოვნის საფუძველზე, რომელიც წარმოადგინა საკონსტიტუციო სასამართლომ. ეს არ არის საარჩევნო რეფორმა, მაგრამ იმ კონტექსტში, რომელშიც ეს ცვლილებები იქნა წარმოდგენილი, ეს არის ადეკვატური კანონი" - აღნიშნა პრეზიდენტმა.