არასამთავრობო ორგანიზაცია „პოზიცია“ ახალ, ერთწლიან პროექტს იწყებს. „რესტორნები მრავალშვილიანი ოჯახების გადასარჩენად“, - ამ სახელწოდებით „პოზიცია“ თბილისში, 12 დიდ რესტორანთან თანამშრომლობის საფუძველზე, 12 თვის განმავლობაში 12 სოციალურად დაუცველი მრვალშვილიანი ოჯახისთვის საკვებით უზრუნველყოფის ორგანიზებას მოახდენს.


პროექტის მიხედვით, თითო რესტორანი თითო ოჯახს მზრუნველობას 1 წლის მანძილზე გაუწევს და აიღებს ვალდებულებას მისი მზრუნველობის ქვეშ მყოფი ოჯახი კვირაში სულ მცირე 2-ჯერ, მთელი კვირის განმავლობაში საკმარისი, მზა საკვებით უზრუნველყოს.


„პოზიცია“-ში მიაჩნიათ, რომ იმ ფონზე, როდესაც ქვეყანა სერიოზული დემოგრაფიული პრობლემების წინაშე დგას და გაეროს მონაცემებით, თუ შობადობის პროცენტული მაჩვენებელი არ გაიზარდა, 2050 წლისთვის შესაძლოა, საქართველო მომაკვდავი ერების რიცხვში აღმოჩნდეს, მრავალშვილიანი ოჯახებისთვის გაწეული მსგავსი დახმარება არა მხოლოდ სოციალურად მძიმე მდგომარეობაში მყოფ მრავალშვილიან ოჯახებს გადაარჩენს, არამედ სხვა ოჯახებსაც მისცემს იმის სტიმულს, რომ მეტი შვილი იყოლიონ, მით უფრო, თუ კი ამ იდეას რესტორნების გარდა მომავალში კერძო სექტორის სხვა წარმომადგენლებიც შეუერთდებიან და თავიანთ წვლილს გაიღებენ მრავალშვილიანი ოჯახების დასახმარებლად.