"უმჯობესია, პრეზიდენტი იმ არგუმენტებს გაეცნოს, რაზეც საარჩევნო კოდექსში ცვლილებებზე პოლიტიკური შეთანხმებაა მიღწეული" - ამის შესახებ ადამიანის უფლებათა საპარლამენტო კომიტეტის თავმჯდომარემ,ეკა ბესელიამ ჟურნალისტებს პრეზიდენტის განცხადების საპასუხოდ განუცხადა.

"ამ დროისთვის იმდენი არგუმენტი იყო ნათქვამი და იმდენზე იყო ეს პოლიტიკური შეთანხმება ახსნილი, რომ არა მგონია, რაიმე გაუგებარი იყოს. პრეზიდენტი, უმჯობესია, ამ არგუმენტებს გაეცნოს. საარჩევნო კამპანია უკვე დაწყებულია და მუდმივი ცვლილებების პროცესში ყოფნა არასტაბილურობას შექმნის. პოლიტიკური შეთანხმების ნაწილია ის ცვლილებები, რასაც მან ხელი მოაწერა და შესაბამისად, სურვილებით გაკეთებული განცხადებები არ ქმნის სერიოზულ პოლიტიკურ ფონს" - აღნიშნა ბესელიამ.

შეგახსენებთ, პრეზიდენტმა, გიორგი მარგველაშვილმა დღეს გამართულ ბრიფინგზე განაცხადა, რომ საარჩევნო კოდექსში ცვლილებებზე ხელისმოწერის მიუხედავად, ფიქრობს, რომ ეს ის რეფორმა არ არის, რომელზეც წლების განმავლობაში სუბრობდნენ.

"განსხვავება მდგომარეობს მხოლოდ იმაში რა ვადებია ამ პროექტის განხორციელების თვალსაზრისით. მთელი პოლიტიკური სპექტრი, არასამთავრობო ორგანიზაციები, ჩვენი საერთაშორისო პარტნიორები, მეტიც, საქართველოს მოსახლეობის 240 ათასზე მეტი ხელმოწერით დადასტურებული პეტიცია მხარს უჭერს იმ პოზიციას, რომ ეს განხორციელდეს 2016 წელსვე. განსხვავებული პოზიცია არის, როგორც ვხედავთ მმართველ კოალიციაში, რომელიც ამ ცვლილებას 2020 წლისთვის გეგმავს. მე ვფიქრობ, რატომ უნდა გადავდოთ ის, რაზეც ვთანხმდებით ყველა, რომ კარგია და მისაღებია, კიდევ 4 წლით, კიდევ უფრო გაუგებარია ჩემთვის. და მე მიმაჩნია და მოვუწოდებ ყველა პოლიტიკურ ძალას, რომ უფრო ინტენსიური კონსულტაციების მეშვეობით მივიდნენ ერთობლივ თანხმობამდე ამ საკითხთან დაკავშირებით“ - განმარტა პრეზიდენტმა.