შეერთებულ შტატებში გასული წლის დეკემბერში ეკონომიკას 292, 000 სამუშაო ადგილი დაემატა და ამ მხრივ ზრდა სოლიდური, მოლოდინებზე გაცილებით მეტი დაფიქსირდა. დასაქმების ბიუროს სტატისტიკის მიხედვით, უმეშევართა რიცხვმა ბოლო 7 წელიწად-ნახევარში ყველაზე დაბალი, 5 პროცენტი შეადგინა.

როგორც BBC იტყობინება, ზრდა გამოვლინდა პროფესიულ და ბიზნეს მომსახურების, სამშენებლო, ჯანდაცვის, ასევე კვების ობიექტებში დასაქმების მიმართულებით.

ამას დამატებული, ოქტომბერსა და ნოემბერში, როგორც ეს ციფრებმა აჩვენა, 50 ათასით მეტი სამუშაო ადგილი შეიქმნა, ვიდრე ეს მანამდე იყო მიჩნეული.

მიუხედავად ამისა, დეკემბერში ყველა სექტორში არ დაფიქსირებულა სამუშაო ადგილების შექმნა. მაგალითად, მაღაროებში ადგილების კლება გრძელდება, და ის 8 000 -ით დაეცა და თუ ამ სექტორში მთელი 2015 წლის მონაცემებს ავიღებთ, საერთო ჯამში სამუშაო ადგილები აქ 129 000-ით შემცირდა.

2015 წლის მეოთხე კვარტალში ამერიკის შეერთებული შტატების ეკონომიკამ თვეში საშუალოდ 284 000 სამუშაო ადგილი შექმნა, რაც წელიწადში, 3 თვის განმავლობაში საუკეთესო მაჩვენებელია.

ეს სოლიდური ციფრები გვარწმუნებს შეერთებული შტატების ეკონომიკის სიძლიერესა და წინააღმდეგობის გაწევის უნარის შესაძლებლობაში იმ დროს, როცა მსოფლიოს მეორე უდიდესი ეკონომიკის მქონე ჩინეთში ბაზრებზე ალიაქოთია შექმნილი, ხოლო გლობალურ ეკონომიკაში გაურკვევლობა სუფევს.

მომხმარებელთა თამამმა ხარჯვამ წაახალისა დამსაქმებლები, ძლიერი დოლარის პირობებში ექსპორტის შემცირების საკომპენსაციოდ, მეტი თანამშრომლები აიყვანონ.