სრულიად საქართველოს კათოლიკოს-პატრიარქმა ილია მეორემ ყოვლადწმინდა სამების ტაძარში ბავშვებისთვის პარაკლისი გადაიხადა. ტაძარში, სადაც პარაკლისზე დასასწრებად უამრავი ბავშვი და მშობელი იყო შეკრებილი "მადლის ქვა" და წმინდა გიორგის წმინდა ნაწილი გამოაბრძანეს.


უწმინდესმა პარაკლისის დაწყებამდე ტაძარში შეკრებილებს მცირე ქადაგებით მიმართა, ქრისტეშობა და ახალი წელი მიულოცა. "მადლი ღვთისა, მადლი ახალშობილისა ძისა თვისისა იესო ქრისტესი იყოს თქვენ და თქვენი ბავშვებისა ზედა. დღეს დავლოცავთ ჩვენს ახალგაზრდებს, ბავშვებს, ჩემს ნათლულებს და მთელ საქართველოს. საოცარი დამთხვევაა, დღეს არის დღესასწაული 14 000 ბავშვისა, რომელიც მოსპო ჰეროდე მეფემ. 14 000 მოწამე ბავშვის მადლი შეგეწიოთ თქვენ და საქართველოს", - განაცხადა პატრიარქმა ქადაგებისას. უწმინდესის თქმით, დღეს პარაკლისით ითხოვენ მადლს პატარებისთვის. პატრიარქმა აღნიშნა, რომ მშობლებმა უნდა დალოცონ მათი შვილები, რადგან მშობლის დალოცვა არის ღვთის დალოცვა.


პატრიარქის ინიციატივით, ყოველ ორშაბათს, სამების საკათედრო ტაძარში ბავშვებისთვის პარაკლისი შესრულდება. პარაკლისს თავად საქართველოს კათოლიკოს-პატრიარქი, 17.00 საათზე აღავლენს, ლოცვა კი 16.00 საათზე დაიწყება. გუშინ ამ იდეის გახმოვანების შემდეგ პატრიარქმა ბრძანა:


"ჩვენ გვქონდა პარაკლისი ბავშვებისათვის, ჩვენი ახალგაზრდა თაობისათვის. ჩვენ მათ სიონში ვლოცავდით, მინდა, რომ ეს წესი აღდგეს. დღეს განსაკუთრებით სჭირდება საქართველოს გაძლიერებული ლოცვა და დალოცვა", - მიმართა მრევლს ილია მეორემ.