„კახა კალაძე „გაზპრომთან“ მოლაპარაკებებისას ბიძინა ივანიშვილს ლობირებს, კალაძე წარმოადგენს ივანიშვლს და არა საქართველოს“ - განცხადება ამის თაობაზე „ერთიანი ნაციონალური მოძრაობის“ წარმომადგენელმა, ნუგზარ წიკლაურმა პარტიის ბრიფინგზე გააკეთა.

წიკლაურის თქმით, პარტია „ერთიანი ნაციონალური მოძრაობის“ წარმომადგენლები ენერგეტიკის მინისტრს „გაზპრომის“ საკითხთან დაკავშირებით, საპარლამენტო უმცირესობის სხდომაზე მისვლას სთხოვენ. იმ შემთხვევაში, თუ სახელმწიფო „გაზპრომთან“ მოლაპარაკებებს არ გაასაჯაროებს, ოპოზიციური პარტია აქციებს გამართავს.

„საქართველო დგება ვითარებაში, როდესაც ერთის მხრივ, კარგავს სტრატეგიულ პარტნიორს აზერბაიჯანის სახით და მეორეს მხრივ, ჩვენი პოზიციები სუსტდება საერთაშორისო არენაზე. ამ გარემოებებიდან გამომდინარე, ჩვენ კიდევ ერთხელ მივმართავთ კახა კალაძეს მოვიდეს უმცირესობის სხდომაზე და პასუხი გასცეს ყველა იმ შეკითხვას, რომელიც არსებობს „გაზპრომთან“ მიმდინარე მოლაპარაკებებთან დაკავშირებით. „გაზპრომის“ კერძო მფლობელებიდან ყველაზე დიდი წილი აქვს ბიძინა ივანიშვილს და რა თქმა უნდა, ეს არის ის გარემოება, რომელიც აჩენს ძალიან დიდ კითხვის ნიშნებს. თუ ისევ იქნება მცდელობა, რომ სახელმწიფომ არ გაასაჯაროოს მოლაპარაკებები, „ერთიანი ნაციონალური მოძრაობა“ მიმართავს ყველა საშუალებას, მათ შორის, საჯარო აქციებსაც, რათა შეაჩეროს ხელისუფლების ეს უკეთური მცდელობები“ - აღნიშნა ნუგზარ წიკლაურმა.