მთავარი პროკურორის, ირაკლი შოთაძისთვის გაუგებარია ყოფილ მთავარ პროკურორთან ბადაშვილთან და მის მოადგილე გოგაძესთან ალეკო ელისაშვილის შეხვედრის თემით სპეკულირება, რადგან შოთაძის თქმით, ელისაშვილთან შეხვედრას არც გიორგი ბადაშვილი და არც გიორგი გოგაძე უარყოფენ, თუმცა მთავარი პროკურორი აზუსტებს, რომ "ელისაშვილთან შეხვედრაზე არ ყოფილა საუბარი შეწყალების კომისიის საქმიანობაზე".


"არც გიორგი ბადაშვილი და არც გიორგი გოგაძე უარყოფენ ასეთი შეხვედრის ფაქტს. შესაბამისად, რატომ ხდება ამ ჩანაწერებით სპეკულირება, ჩემთვის გაუგებარია. მათ დაადასტურეს, რომ იყო შეხვედრა, შეხვედრა მთავარ პროკურორთან, თუმცა აქ არის საუბარი იმაზე, რომ ელისაშვილთან შეხვედრაზე არ ყოფილა საუბარი შეწყალების კომისიის საქმიანობაზე და იმ პრობლემატიკაზე, რომელიც ამ შეწყალების საქმიანობას თან ახლავს და იმ შესაძლო დანაშაულებრივ ფაქტებზე. შესაბამისად, ეს ფაქტები გამოკვლეულია და სამწუხაროდ, პროკურატურას იმის რესურსი არ აქვს, რომ წელიწადნახევრის განმავლობაში შეინახოს ასეულობით ჩანაწერი, რაც საკმაოდ დიდ რესურსს საჭიროებს", აღნიშნა შოთაძემ და დაამატა:


„მე მინდა სურვილი გამოვთქვა და იმედი გამოვთქვა, რომ ალეკო ელისაშვილი ბოლოსდაბოლოს დაასახელებს იმ პიროვნებას, რომელმაც, მისი სიტყვებით, მას მიაწოდა ინფორმაცია კორუფციული დანაშაულის შესახებ“, თქვა შოთაძემ.