ნავთობზე ფასების დაცემამ შესაძლოა აიძულოს რუსეთი გადახედოს თავის 2016 წლის სახელმწიფო ბიუჯეტს, ამის შესახებ გამაფრთხილებელი განცხადება პრემიერ მინისტრმა დიმიტრი მედვედევმა გააკეთა.


მან თქვა, რომ ქვეყანა მზად უნდა იყოს "ყველაზე ცუდი შემთხვევის" ეკონომიკური სცენარისთვის, თუ კი ფასების დაცემა გაგრძელდა.


ოთხშაბათს ერთი ბარელის ფასი 32 აშშ დოლარზე ნაკლები იყო და ბოლო 15 თვის განმავლობაში 70%-ით დაეცა. რუსეთის მთავრობის შემოსავლების დაახლოებით ნახევარი კი ნავთობისა და გაზის გაყიდვებიდან ივსება.


2016 წლის ფედერალური ბიუჯეტი, რომელიც ოქტომბერში მოიწონეს დაფუძნებული იყო ნავთობის შემდეგ ფასზე - 1 ბარელი -50 აშშ დოლარი 2016 -ში - ციფრი, რომელსაც პრეზიდენტი ვლადიმერ პუტინი მას შემდეგ აღწერდა, როგორც "არარეალისტურს".


მთავრობის დეპარტამენტებზე გაიცა ბრძანება, რომ ხარჯები 10%-ით შეამცირონ, მსგავსად 2015 წლისა, იუწყება "როიტერსი".


შემცირებებში არ მოხვდება პენსიები და მთავრობის მიერ დაფინანსებული უწყებების თანამშრომელთა ხელფასები, რაც დაზოგავს დაახლეობით 700 მილიარდ რუბლს (9.1 მილიარდ აშშ დოლარს).


რუსეთის ფინანსთა მინისტრმა ანტონ სილუანოვმა განაცხადა, რომ რუსეთის ბიუჯეტი მხოლოდ იმ შემთხვევაში შეიძლება დაბალანსდეს, თუ კი ბარელი ნავთობის ფასი 82 აშშ დოლარი იქნება.


ეკონომიკის მინისტრმა ალექსეი ულიუკაევმა გააფრთხილა საზოგადოება, რომ რუსეთი დგას იმის საშიშროების წინაშე, რომ ბარელი ნავთობის ფასი ხანგრძლივი დროის განმავლობაში 15 ან 20 აშშ დოლარს შეადგენდეს.


"ყველაზე დიდი რისკი იმაში მდგომარეობს, რომ შესაძლოა გრძელვადიან პერსპექტივაში, წლების ან დეკადების განმავლობაში, ნავთობზე დაბალი ფასები შენარჩუნდეს," განაცხადა რუსეთის ეკონომიკის მინისტრმა.