მე მეამაყება, რომ “ქართუ ჯგუფში” ვმუშაობდი, – ასეთი პასუხი გასცა თბილისის საკრებულოს სხდომაზე თბილისის მერობის კანდიდატმა, გიორგი ლილუაშვილმა საკრებულოს ოპოზიციონერ წევრს, ფრაქცია “ნაციონალური მოძრაობის” თავმჯდომარეს სევდია უგრეხელიძეს.

თბილისის საკრებულოში სხდომა მიმდინარეობს, რომლის პირველ საკითხად დეპუტატებმა თბილისის მერის მოადგილის პოსტზე გიორგი ლილუაშვილის კანდიდატურა უნდა განიხილონ.

სხდომაზე გიორგი ლილუაშვილი დეპუტატებს თბილისის ვიცე მერმა, ლაშა აბაშიძემ წარუდგინა, რის შემდეგაც დეპუტატების კითხვებს გიორგი ლილუაშვილმა უპასუხა.

სევდია უგრეხელიძემ კითხვით მიმართა გიორგი ლილუაშვილს აქვს თუ არა უხერხულობა მას იმის გამო, რომ იგი “ქართუ ჯგუფში” მუშაობდა ბიძინა ივანიშვილთან და “პანორამა თბილისთან” ასოცირდება. სევდია უგრეხელიძის განცხადებით, გიორგი ლილუაშვილს შესაძლოა მომავალშიც მოუწიოს ასეთი პროექტების და მითითებების განხორციელება. გიორგი ლილუაშვილმა საპასუხოდ განაცხადა, რომ მხოლოდ “ქართუ ჯგუფს” არ უკავშირდება მისი საქმიანობა. იგი იყო “საქართველოს ავიახაზებში”, “აირზენაში”, ფინანსთა სამინისტროში, მსოფლიოს საბაჟო ორგანიზაციაში კი საბაჟო სამსახურს წარმოადგენდა. მისივე თქმით, “ქართუ ჯგუფის” განხორციელებულია ისეთი პროექტები, როგორიც არის ბოტანიკური ბაღის გადარჩენა, რამდენიმე თეატრის რეაბილიტაცია და სხვა პროექტები.