30 ნოემბრიდან დღემდე H1N1 ვირუსის ლაბორატორიულად დადასტურებული 19 შემთხვევა დაფიქსირდა. ამის შესახებ იაშვილის სახელობის ბავშვთა ცენტრალური საავადმყოფოს სამედიცინო დირექტორმა ვანო ჩხაიძემ დღეს, დაავადებათა კონტროლის ეროვნულ ცენტრში გამართულ პრესკონფერენციაზე განაცხადა.

"ბოლო კვირის განმავლობაში, შეიმჩნევა მატება, თუმცა თითქმის შემთხვევების იმ რაოდენობის მსგავსია, რაც 2015 წლის ანალოგიურ პერიოდში ფიქსირდებოდა. რაც შეეხება რეკომენდაციებს, ძალიან დიდი მნიშვნელობა აქვს მძიმედ მიმდინარე გრიპის შემთხვევებში მკურნალობის დროულად დაწყებას", - აღნიშნა ჩხაიძემ.

მისივე თქმით, ანტივირუსული პრეპარატები ეფექტურია დაავადების დაწყებიდან პირველი სამი დღის განმავლობაში. კლინიკის სამედიცინო დირექტორმა ურჩია მშობლებს, 38,5 გრადუსზე მეტი ტემპერატურის დაფიქსირების შემთხვევაში, ასევე თუ ბავშვს დაეწყო ძილიანობა, არ იღებს საჭმელს, ხოლო უფროსებს ახასიათებს თავის ტკივილი, სახსრის ტკივილი, ზოგიერთ შემთხვევაში პირღებინებაც, აუცილებლად მიმართონ ექიმს, ნუ დაელოდებიან სამი-ხუთი დღის გასვლას, რადგან გრიპის ვირუსის დროს მკურნალობის დროულად დაწყება მნიშვნელოვანია.

როგორც ჩხაიძემ განაცხადა, ამ მომენტისთვის იაშვილის ბავშვთა ცენტრალურ საავადმყოფოში 3 პატარა პაციენტი რჩება. კლინიკის სამედიცინო დირექტორის განცხადებით, აღნიშნული შემთხვევებიდან კლინიკის მხოლოდ 6 პაციენტს ჰქონდა ფილტვების ანთება, თუმცა ისინი სამკურნალოდ კრიტიკული მედიცინის დეპარტამენტში მოთავსებას არ საჭიროებდნენ. ყველა მათგანი ამ მომენტისათვის ბინაზეა გაწერილი.