„მზად ვართ გადავცეთ ხელისუფლებას გეგმა, თუ როგორ უნდა გამოვიდეს ქვეყანა კრიზისიდან და როგორ უნდა გაუმჯობესდეს ამ ქვეყანაში გაჭირვებული ოჯახების მდგომარეობა“ - აღნიშნული განცხადება „ერთიანი ნაციონალური მოძრაობის“ ერთ-ერთმა ლიდერმა, დავით ბაქრაძემ საგანგებო ბრიფინგზე გააკეთა.

“ბოლო სამი წლის განმავლობაში, „ქართული ოცნების და ივანიშვილის მთავრობის მიერ დაშვებულმა უხეშმა შეცდომებმა, ერთიანი ეკონომიკური ხედვის არარსებობამ, უნიათობამ, მავნებლურმა რეგულაციებმა საქართველო შეიყვანა ღრმა ეკონომიკურ კრიზისში. რისი შედეგიც გახლავთ ლარის გაუფასურება, ეკონომიკური ზრდის შეჩერება და ათი ათასობით ოჯახის უფრო მეტ სიღარიბეში ცხოვრება.

სამწუხაროდ, მთავრობა დღემდე არ აღიარებს ეკონომიკურ პრობლემებს და დღემდე ხელისუფლებას არ წარმოუდგენია ერთიანი, გააზრებული გეგმა, თუ როგორ უნდა მოხდეს საქართველოს გამოყვანა ეკონომიკური კრიზისიდან. რა თქმა უნდა, საბოლოო გამოსავალი ამ ყველაფრიდან გახლავთ 2016 წლის საპარლამენტო არჩევნებზე „ქართული ოცნების“ ხელისუფლების მშვიდობიანი და პოლიტიკური გზით დასრულება და ეს აუცილებლად მოხდება წელს. მაგრამ არჩევნებამდე დარჩენილია 9 თვე, სწორედ ამიტომ ჩვენ, როგორც პასუხისმგებლობის მქონე ოპოზიციას აუცილებლად მიგვაჩნია ყველაფერი გავაკეთოთ იმისთვის, რომ არჩევნებამდე დარჩენილ 9 თვეში შეჩერდეს ქვეყნის ეკონომიკური უკუსვლა, შეჩერდეს ჩვენი ხალხის გაღარიბება.

ჩვენ მზად ვართ, შევხვდეთ პრემიერ კვირიკაშვილს და გავაცნოთ მას ის ეკონომიკური გეგმა, რომელსაც წლების მანძილზე წარვუდგენთ საზოგადოებას. შეგახსენებთ, რომ უმცირესობასთან შეხვედრის დროს, მთავრობის დამტკიცებამდე, პრემიერმა გამოთქვა მზადყოფნა რომ შეხვედროდა ოპოზიციას და ჩვენთან ერთად განეხილა ანტიკრიზისული გეგმა. თუ მისი ეს სიტყვები იყო რეალური განზრახვა და არამხოლოდ სიტყვები სიტყვებისთვის, ჩვენ მზად ვართ ასეთი შეხვედრისთვის, ჩვენ მზად ვართ ძალიან საქმიანი დიალოგისთვის“ - აღნიშნა ბაქრაძემ.