პროკურორ ვახტანგ ქირიასა და ბიძინა კუჭავას გარდაცვალება წინასწარ დაწერილი სცენარია, - ამის შესახებ ბიძინა კუჭავას ოჯახის ადვოკატმა, ნათია კორკოტაძემ დღეს გამართულ პრესკონფერენციაზე განაცხადა. ადვოკატმა აღნიშნა, რომ დავით პოპოვი, რომელიც გამოძიების ინფორმაციით, ბიძინა კუჭავას თვითმკვლელობის მომენტში მასთან ერთად ავტომობილში იმყოფებოდა, გუშინ სუს-მა კუჭავას ადვოკატებთან მიაგზავნა. კერძოდ, ნათია კორკოტაძის თქმით, დავით პოპოვი თავად დაუკავშირდა კუჭავების ოჯახს და სთხოვა, რომ ადვოკატებთან შეხვედრაში დახმარებოდა.

"მე მომცეს ოჯახის წევრებმა მისი ნომერი, გადავურეკე პოპოვსა და ვთხოვე შეხვედრა. დრო რამდენჯერმე შეიცვალა, საბოლოოდ დიღომში, მაიაკოვსკის ძეგლის მიმდებარე ტერიტორიაზე შევთანხმდით. იგი მოვიდა, პალტო შეხსნილი ჰქონდა, სადაც დავინახე შნურები და ვუთხარი, რომ ბატონო დავით, თქვენ ჩამწერი მოწყობილობა გაქვთ დამონტაჟებული. მან ეს უარყო და პალტო შეიკრა. შემდეგ დავინახე პერანგის ღილზე როგორ ჰქონდა ვიდეოთვალი. იგი გვეუბნებოდა მე და ჩემს კოლეგებს, რატომ დამიბარეთო. მე მას ვუთხარი, რომ შეხვედრის ორგანიზატორი თავად იყო, თუმცა უხეში ტონით ამბობდა, რატომ დამიბარეთო. მანამდე კი სანამ მოვიდოდა, მითხრა, რომ იყო საბურთალოზე და მაშინვე ვიეჭვე, რომ იგი სუს-ის შენობაში იმყოფებოდა", - განაცხადა ნათია კორკოტაძემ.

კოტრიკაძის თქმით, თუკი დავით პოპოვი ადვოკატებთან შეძლებდა ფარული ჩანაწერის მომზადებას, იგი ამას სუს-ში მიიტანა და შესაძლოა ადვოკატების მიმართ სისხლის სამართლის პასუხისმგებლობის საკითხიც დამდგარიყო, თითქოს მათ პოპოვზე ზემოქმედება ან ზეწოლა მოახდინეს.

კუჭავას ოჯახის ადვოკატი საუბრობს ასევე მკვლელობების დადგმულ სცენარზე და აცხადებს, რომ არ შეიძლება შს მინისტრის მოადგილეს, არჩილ თალაკვაძეს და ზოგადად გამოძიებას ზედმიწევნით სცოდნოდა როგორ მოკლა ვახტანგ (პაატა) ქირია ბიძინა კუჭავამ აბაზანაში, შემდეგ როგორც დაცალა სისხლისგან და როგორ გამოიყენა ამ ყველაფრისთვის ე.წ. ბარგალკა, რომელმაც შემდეგ თითი დაუზიანა.

"ეს დეტალები მხოლოდ იმ შემთხვევაში შეიძლება სცოდნოდათ მათ, თუკი ბინაში სადაც ქირია მკვდარი იპოვეს, დამონტაჟებული იყო ვიდეოთვალი ან ამ ყველაფერს ესწრებოდა პოპოვი. ასეთ შემთხვევაში პოპოვის და მისი მეუღლის მიმართ მინიმუმ დანაშაულის დაფარვისთვის პასუხისმგებლობის საკითხი უნდა დადგეს", - განაცხადა ნათია კორკოტაძემ.

ადვოკატის თქმით, უამრავი შეკითხვა არსებობს თუნდაც იმასთან დაკავშირებით რომ პაატა ქირიას სახელი უკავშირდება ე.წ. კასრების საქმეს. ადვოკატის თქმით, შეეცდება ნაწილობრივ აღნიშნულ შეკითხვებზე პასუხი თბილისის პროკურორ მიხეილ შაყულაშვილთან დღეს დაგეგმილ შეხვედრაზე გაეცეს. რაც შეეხება დავით პოპოვის მიერ გუშინ ნახსენებ გოჩა კუჭავას, ნათია კორკოტაძემ მისი ვინაობაც განმარტა და აღნიშნა, რომ გოჩა კუჭავა არის ბიძინა კუჭავას ბიძაშვილი, რომელიც მოსკოვში ცხოვრობს. გოჩა კუჭავა ერთ-ერთი იყო, ვისაც ბიძინა კუჭავა ესაუბრა გარდაცვალების დღეს.