„ვინმეს თუ აქვს იმისი მოლოდინი, რომ საქართველოში ოდესმე დადგება ის დრო, რომ სამხედროებს ჩამოართმევენ ხმის უფლებას, გარწმუნებთ, რომ ვერასდროს ვერ გაიმარჯვებენ ასეთი პოლიტიკური ძალები“ - აღნიშნული განცხადება თავდაცვის მინისტრმა, თინათინ ხიდაშელმა ტელეკომპანია „რუსთავი-2“-თან საუბრისას, გააკეთა.

მინისტრის თქმით, პოლიტიკურმა ძალებმა, რომლებიც ბოიკოტს უცხადებენ გარდაბნის რიგგარეშე არჩევნებს, იციან რომ არჩევნებში გამარჯვების შანსი არ აქვთ.

„ყველა არასამთავრობო ორგანიზაცია მინდა დავპატიჟო გარდაბნის რაიონში, რომ ნახონ რას წარმოადგენს აღნიშნული რაიონი თავდაცვის სამინისტროს მიზნებისთვის. 700 სამხედრო კი არა, 2 700 რომ არ არის რეგისტრირებული, მე ამით ვარ გაოცებული. გარდაბანში არის პრაქტიკულად ყველა სამხედრო შენაერთი, რაც კი თბილისის გარშემო არსებობს. ამ ადამიანებმა იციან, რომ არავითარი შანსი არ აქვთ გამარჯვების და ამიტომ ბოიკოტისთვის საბაბს ეძებენ. მათ ჰგონიათ, რომ იპოვეს ეს საბაბი, მაგრამ მე მინდა მათ ვუთხრა, რომ ამით კიდევ უფრო მეტად ამყარებენ შეიარაღებულ ძალებში საკუთარი პოლიტიკური ძალების მიმართ ანტიპათიას“ - აღნიშნა ხიდაშელმა.

შეგახსენებთ, გარდაბნის მუნიციპალიტეტში რიგგარეშე არჩევნებს ოპოზიციური პარტიების ერთი ნაწილი ბოიკოტს უცხადებს. მათი განცხადებით, ბოიკოტის მიზანი ხელისუფლების პოლიტიკური იძულებაა, არსებული საარჩევნო სისტემის შესაცვლელად.