4 ადამიანია მოკლული და რამდენიმეს დაზიანებები აქვს მიღებული კანადის დასავლეთ პროვინციაში, სასკატჩევანში მომხდარი სროლების შედეგად. ამის შესახებ BBC ადგილობრივ პოლიციაზე დაყრდნობით იუწყება.

პოლიციის ცნობით, ლოჯეის სკოლასა და სხვა ადგილას მომხდარი სროლების შემდეგ, ეჭვმიტანილი მამაკაცი დააკავეს და ბავშვები უსაფრთხო ადგილას გადაიყვანეს.

კანადის პრემიერ მინისტრმა ჯასტინ ტრუდომ უფრო ადრე განაცხადა, რომ მოკლული იყო 5 ადამიანი, მაგრამ მოგვიანებით ამ ინფორმაციის კორექტირება მოხდა. სკოლაში განხორციელებული სროლები იყო „თითოეული მშობლის საშინელი კოშმარი, საზოგადოება თავბრუდახვეულია“, განაცხადა ტრუდომ.

კანადის პრემიერ მინისტრმა, რომელმაც ამ ფაქტის შესახებ შვეიცარიის ქალაქ დავოსში ისაუბრა, შეაქო თავდამსხმელის მიმართ პირველი წინააღმდეგობის გამწევნი, რომელთაც „სწრაფად და მამაცურად იმოქმედეს“.

ლა ლოჯეის მოქმედმა მერმა განაცხადა, რომ მისი 23 წლის ქალიშვილი მარია, მასწავლებელი, ერთ-ერთია სკოლის მსხვერპლთა შორის.

მან აგრეთვე განაცხადა, რომ როგორც მას პოლიციამ უთხრა, შეიარაღებულმა მამაკაცმა სკოლაში სროლების განხორციელებამდე, მის ორ დედ-მამიშვილს ესროლა სახლში და შემდეგ აიღო გეზი სკოლისაკენ.

პოლიციამ დანაშაულში ეჭვმიტანილი 17 წლის ბიჭი დააკავა, რომლის ვინაობაც, მისი არასრულწლოვანი ასაკიდან გამომდინარე არ ხმაურდება.