წელს იგეგმება ქუთაისიდან ალპანის მიმართულებით 15-კილომეტრიანი გზის მშენებლობა, ამის შესახებ რაჭა-ლეჩხუმ-ქვემო სვანეთის გუბერნატორმა პაპუნა მარგველიძემ გადაცემა "ეპიცენტში" სტუმრობისას განაცხადა.


პაპუნა მარგველიძის განცხადებით, რაჭაში, ლეჩხუმსა და ქვემო სვანეთში მნიშვნელოვანი პროექტები ხორციელდება და ყველაფერი კეთდება იმისთვის, რომ მოსახლეობას ნორმალურად ცხოვრების საშულება მიეცეს.


"ჩვენს რეგიონში აქტიურად მიმდინარეობს ინფრასტრუქტურული პროექტები. წელს იგეგმება ქუთაისიდან ალპანის მიმართულებით 15-კილომეტრიანი გზის მშენებლობა. ყველაზე მნიშვნელოვანია, რომ უწერის პროექტი უკვე დასრულდა და მალე დაიწყება სამუშაოები, რაც ტურიზის განვითარებასაც ხელს შეუწყობს.


"საპარტნიორო ფონდი" აქტიურად არის ჩართული შაორის, უწერისა და შოვის განვითარებაში. პერიოდულად სოფლებში ვაკეთებთ გრუნტის გზებს, კაპიტალური სანიაღვრეებით. დაგეგმილია ხიდების რეაბილიტაცია, მიმდინარეობს ნაპირსამაგრი სამუშაოები.


პრემიერთან შეხვედრაზე დაისვა ყველა ის საკითხი, რაც აწუხებს მოსახლეობას. ძალიან ცუდი მემკვიდრეობა დაგვხვდა, გაკეთებული პროექტების ხელახალი გაკეთება გვიწევს," ამბობს გუბერნატორი.


მარგველიძემ გადაცემაში მთის კანონის შესახებაც ისაუბრა და თქვა, რომ ის დიდი სტიმული იქნება მიგრაციის პროცესის შესაჩერებლად.


"იზრდება მოსახლეობის შემოსავალი, რასაც მთის კანონი ითვალისწინებს, აქ გათვალისწინებულია, როგორც სოციალურად დაუცველი, ისე მასწავლებელი, ექიმი, პენსიონრი და ა.შ. ყველა ახლად დაბადებულ ბავშვზე ინიშნება 100 ლარის დახმარება ყოველთვიურად, არის შეღავათები ელექტროენერგიის გადასახადზე, რაც დიდი სტიმულია მოსახლეობის დასამაგრებლად," განაცხადა მარგველიძემ გადაცემაში სტუმრობისას.