"რუსეთის საგარეო საქმეთა სამინისტრომ თავის დიპლომატიურ წარმომადგენლობებს მითითება მისცა, რომ მაქსიმალურად დაათბონ ურთიერთობა საქართველოს დიპლომატიურ წარმომადგენლობებთან, ევროპის სხვადასხვა ქვეყანაში" - აღნიშნული განცხადება ექსპერტმა, მამუკა არეშიძემ დღეს გამართულ პრესკონფერენციაზე გააკეთა.

"ჩემი აზრით, რუსეთი ცდილობს ამ მეთოდით ერთგვარი განწყობა შეუქმნას სხვებს, რომ მათ ქართველებთან საერთო ენა გამონახეს და სხვების ჩარევა ურთიერთობაში საჭირო აღარ არის. ეს სწორი მეთოდია რუსეთის მხრიდან სათავისოდ, მაგრამ როგორც ჩანს, საქართველოს დიპლომატიურმა წარმომადგენლობებმა ეს გაშიფრეს და მაინცდამაინც ასეთი ტიპის კონტაქტებზე არ მიდიან. ლავროვის განცხადებებში, გარკვეული რევერანსები იყო ქართული მხარის მიმართ, მაგრამ თაფლის კასრში ერთი კოვზი კუპრიც გაურია და სწორედ ეს იყო პანკისის თემა. მოსკოვში ბევრად უკეთ იციან, რა ხდება პანკისში, ვიდრე თბილისში ზოგიერთმა. მათ იციან, რომ იქ არავითარი ტერორისტთა მოსამზადებელი ბანაკი არ არის, მაგრამ სამწუხაროდ, პანკისი არის ძალიან ცუდი ბრენდი, ყველამ იცის, რომ იქ თავის დროზე რაღაც ცუდი ხდებოდა და ამის გამო შესაბამისი რეაგირებაც აქვთ. ჩვენ სწორად უნდა შევაფასოთ ის, რაც თქვა ლავროვმა და სწორად უნდა გავიგოთ გზავნილები, რომელიც ამ პრესკონფერენციაზე გაჟღერდა – ანუ, რუსეთი მზად არის საქართველოსთან ურთიერთობების დასათბობად, თუ ჩვენ დავივიწყებთ ოკუპირებულ ტერიტორიებს და მეორე, თუ არ დავათბობთ ამ ურთიერთობებს და არ გავაჩერებთ დანარჩენ მსოფლიოს, რომელიც ცდილობს, საქართველოს ტერიტორიული მთლიანობა აღდგეს, მაშინ გავიხსენოთ პანკისი", - განმარტა მამუკა არეშიძემ.