„წინა ხელისუფლების დროს, უმთავრესი მიზეზი მათი დამარცხების იყო სწორედ ის, რომ ქვეყანაში სუფევდა უსამართლობა. იმ დროს ვინც უსამართლობას ემსახურებოდა, სწორედ მათი დაწინაურება ხდება დღეს“ - აღნიშნული განცხადება პარლამენტში ფრაქციების გამოსვლებზე, ფრაქცია „თავისუფალი დემოკრატების“ წარმომადგენელმა, ვიქტორ დოლიძემ გააკეთა.

„მინდა ძალიან დიდი მადლობა გადავუხადო პრეზიდენტს ძალიან მრავლისმომცველი და ჩემი აზრით, ძალიან აქტუალური თემების წამოწევისთვის. მე ვფიქრობ, რომ თქვენი ბოლო გამოსვლის შემდეგ საქართველოს პარლამენტში, რომელიც გასული წლის მარტში გაიმართა, სასიკეთო ჩვენს ქვეყანაში არაფერი არ შეცვლილა. ერთი პოზიტივი, რომელიც დღეს არ შეიძლება არ აღვნიშნოთ არის ის, რომ დღეს, საქართველოს პრეზიდენტი და მთავრობა ერთად იყო - ეს არის მნიშვნელოვანი.

მე მინდა დავიწყო საუბარი სასამართლოს და მართლმსაჯულების სისტემით. ჩვენ, „თავისუფალი დემოკრატები“ დღევანდელ სასამართლოს მურუსიძის სასამართლოს ვეძახით. ჩემთვის წარმოუდგენელია, თუ რატომ აკეთებთ ამას თქვენ. შეიძლება, რომ გირგვლიანის მოსამართლესთან დაკავშირებით, რაიმე კითხვა კიდევ არსებობდეს? შეიძლება, ლამაზი ასოებით კარგი კანონებიც წეროთ, მაგრამ პოლიტიკური ნების არარსებობის შემთხვევაში, ამგვარი სასამართლო რეფორმის გატარება, შეუძლებელია. ჩვენ, ბ-ნო პრეზიდენტო, ამისთვის არ გვიბრძვია, ჩვენ მურუსიძის სასამართლოსთვის არ გვიბრძვია. აი, თუნდაც სერგო თეთრაძის მოსამართლეც ავიღოთ“ - მიმართა ვიქტორ დოლიძემ პრეზიდენტს.