„საქართველოს აქვს საუკეთესო პირობები იმისთვის, რომ პოზიტიური გამტარის როლი ითამაშოს რეგიონში“ - ამის შესახებ ფრაქცია „ეროვნული ფორუმის“ წარმომადგენელმა, გუბაზ სანიკიძემ პარლამენტში, ფრაქციების მოსმენისას განაცხადა.

„პირველი და უმთავრესი საკითხი, რომელიც „ეროვნული ფორუმისთვის“ ყველაზე მნიშვნელოვანია, ეს არის ქვეყნის უსაფრთხოების საკითხი. მსოფლიო იცვლება, ბატონებო და ქართული სახელმწიფო უნდა იყოს ადეკვატური ამ ცვლილებებთან დაკავშირებით. საქართველოს უსაფრთხოება უშუალოდ დაკავშირებულია რეგიონის უსაფრთხოებასა და მიმდინარე პროცესებთან. ეს პროცესები კი ღრმავდება. მე არ ვარ ოპტიმისტი, როგორც ჩანს, უფრო დამძიმდება ვითარება. რაღაცა ახალი იბადება და ეს ახალი როგორი იქნება, დამოკიდებულია მსოფლიოზე. ძალიან დიდი მნიშვნელობა აქვს საქართველოს როლს და ფუნქციას. რა ფუნქცია უნდა ჰქონდეს ჩვენს სახელმწიფოს? თქვენ ახსენეთ, ბ-ნო პრეზიდენტო, ამერიკული საგარეო პოლიტიკის რადარები, სადაც საქართველო არ ჩანს. აუცილებელია, საქართველომ შეიძინოს ფუნქცია. ჩვენ ამ გზაზე ვდგავართ. საქართველოსთვის ყველაზე მნიშვნელოვანი „ომი და მშვიდობის“ საკითხია. უკვე დასაწყებია მშვიდობაზე ფიქრი. საქართველო არის ერთადერთი ქვეყანა რეგიონში, რომელსაც ყველა მეტოქესთან აქვს კარგი ურთიერთობა. შესაბამისად, მიგვაჩნია, რომ ამ საქმეში საქართველო გახდება სერიოზული მოთამაშე. მე მგონია, რომ ზოგჯერ ჩვენ დაკავებული ვართ თვითცენზურით, საკუთარი ძალების იმედი არ გვაქვს. მერწმუნეთ, რომ ჩვენ ეს გვაქვს“ - აღნიშნა სანიკიძემ.