პარლამენტის ფრაქცია „ქართული ოცნების“ ხელმძღვანელის გია ვოლსკის განცხადებით, საქართველოში მედიის თავისუფლება გარანტირებულია, ისევე როგორც სასამართლო სისტემის.

ამის შესახებ მან პარლამენტში სიტყვით გამოსვლისას განაცხადა და ქვეყანაში მედიასთან დაკავშირებულ სიტუციაზე ისაუბრა.

როგორც მან განაცხადა, მედიის საკითხი მხოლოდ მაშინ არ უნდა იყოს მნიშვნელოვანი, როცა მისი საკითი განიხილება სასამართლოში. მისივე თქმით, არც ერთ პოლიტიკოსს არ აქვს პრობლემა რომელიმე მედია საშუალებასთან თანამშრომლობაში.

„ჩვენ არ გვჭირდება მეხოტბე მედია. საქართველოში და თუნდაც მის ფარგლებს გარეთ მე არ მეგულება არც ერთი მედია საშუალება, რომელიც ხოტბას ასხამს საქართველოს ამჟამინდელ ხელისუფლებას.

მედია საშუალებების საკითხი მხოლოდ მაშინ არ უნდა დადგეს ქვეყნის პრეზიდენტის დღის წესრიგში, როდესაც ერთ-ერთი მისი წარმომადგენელის, ფაქტიურად კონკრეტული პოლიტიკური პარტიის საკუთრების საკითხი განიხილება სასამართლოში. არც პირადად მე და არც რომელიმე ჩემი კოლეგა ვერავითარ პრობლემას ვერ ვხედავთ იმაში, რომ ითანამშრომლონ ნებისმიერ მედია საშუალებასთან, მათ შორის მასთან რომლის ხელმძღვანელი ჯოჯოხეთის მოწყობას გვპირდება და ფრიად საეჭვო დიალოგებს აწარმოებს უკრაინაში მყოფ მის ყოფილ პოლიტიკურ ლიდერთან დესტაბილიზაციისთვის საჭირო მეთოდებთან დაკავშირებით,“-განაცხადა ვოლსკიმ.

მისივე თქმით, საქართველოში მედიის თავისუფლება გარანტირებულია, ისევე როგორც სასამართლო სისტემის მიუხედავად იმისა, მიიღებს თუ არა იგი მთავრობისათვის სასიამოვნო სიუჟეტებს ან გადაწყვეტილებებს. როგორც მან განაცხადა, ეს პოლიტიკა უცვლელია და მისი გარანტი პრეზიდენტიცაა.