ქობულეთის მუნიციპალიტეტში ახალი წლიდან ჯანმრთელობისა და სოციალური დაცვის ახალი პროგრამები ამოქმედდა. მიზნობრივი პროგრამების განხორციელების მიზნით ადგილობრივი თვითმმართველობა 1 769 113 ლარის დახარჯვას გეგმავს.

მუნიციპალიტეტში წელსაც გრძელდება იმ პროგრამების განხორციელება, რომლებიც ქრონიკულად პროგრესირებადი დაავადებით დაავადებულთა მხარდაჭერას ითვალისწინებს. მედიკამენტოზური დახმარება ბრონქული ასთმით, ფენილკეტონურიით, ეპილეფსიითა და მეორადი ეპილეფსიური სინდრომით დაავადებულებს გაეწევათ. ჯანდაცვის მიმართულებით მუნიციპალიტეტში მოქმედებს გულის ქირურგიის თანადაფინანსების პროგრამა, რომელიც კარდიოქირურგიული ოპერაციების თანადაფინანსების მიზნით მატერიალურ დახმარებას ითვალისწინებს, დიალეზის სახელმწიფო და ცერებრალური დამბლით დაავადებულ ბავშვთა ფსიქოსომატური აბილიტაციას-რეაბილიტაციის პროგრამებში ჩართულ ბენეფიციართათვის ტრანსპორტირების პროგრამა მოქმედებს, ასევე გამგეობაში წელსაც გაგრძელდება პირველადი ჯანდაცვის ცენტრების მხარდაჭერის პროგრამა.

მუნიციპალიტეტის გამგეობის ცნობით, სოციალურად დაუცველი მოსახლეობის მხარდაჭერის მიზნით ქობულეთში უფასო გაზიფიცირების, მუნიციპალური უფასო სასადილოსა და უმწეო გარდაცვლილის ოჯახზე ერთჯერადი დახმარების პროგრამები მოქმედებს. სოციალური დახმარება გაეწევა ხუთ და მეტ მცირეწლოვან ბავშვთა ოჯახებს, ასევე ყოველ მესამე და მომდევნო ახალშობილებზე მოხდება ერთჯერადი მატერიალური დახმარების გაწევა, ხოლო დედ-მამით ობოლ ბავშვთა ოჯახებზე 100 ლარის ოდენობით ყოველთვიური დახმარება გაიცემა. წელს გამგეობა სტიქიის შედეგად დაზარალებული ოჯახების კომპენსირების მიზნით 1 137 933 ლარს დახარჯავს.

2016 წელს ქობულეთის მუნიციპალიტეტში ჯანმრთელობისა და სოციალური დაცვის 15 მიზნობრივი პროგრამა მოქმედებს.