ეს რეჟიმი არის ძალიან დროებითი, რამდენიმეთვიანი კიდევ, ამის შესახებ საქართველოს ყოფილმა პრეზიდენტმა, ოდესის ოლქის გუბერნატორმა მიხეილ სააკაშვილმა მიუნხენიდან „რუსთავი 2“-ის გადაცემა „არჩევანში“ პირდაპირ ეთერში ჩართვისას განაცხადა.

სააკაშვილმა განაცხადა, რომ ფატუ ბენსუდასთან გუშინ კონტაქტი ჰქონდა და მიაჩნია, რომ საქართველოს დასამალი არაფერი აქვს და „ვისაც გამოკითხავენ, მათ უნდა ილაპარაკონ სიმართლე, სიმართლე, როგორც ყველაფერი იყო,“ თუმცა იქვე დაამატა, რომ ივანიშვილის საქართველოს ხელისუფლებაში ყოფნის პირობებში დიდია იმის ალბათობა, რომ მოწმეებზე მანიპულირება მოხდეს.

„ივანიშვილისთვის პრინციპული იყო, რომ ყველაფერი დაებრალებინა საქართველოსათვის, მისთვის პრინციპული იყო, რომ რუსული ვერსია დადასტურებულიყო. ეს არის კაცი, რომელმაც ძალიან კარგად იცის მოწმეების მანიპულირებაც და ყველა სხვა მექანიზმის გამოყენება ამ მიმართულებით. მაგრამ ყველას კარგად უნდა ესმოდეს, რომ ეს რეჟიმი არის ძალიან დროებითი, მე ვლაპარაკობ, რომ რამდენიმეთვიანი კიდევ, ცხოვრება არის დიდი წინ, ეს გამოძიება მრავალწლიანია ალბათ, ამიტომ მე ვფიქრობ ყველაფერი დადგება თავის ადგილზე და სიმართლე საბოლოოდ გაირკვევა და საბოლოო ჯამში, როდესაც რუსეთშიც მოხდება ცვლილებები, ხელმისაწვდომი გახდება ასევე რუსული მასალები და მათ შორის რუსეთში მყოფი ის დამნაშავეები, რომელთაც რეალურად ის გააკეთეს, რაც მოხდა საქართველოში,“ განაცხადა მიხეილ სააკაშვილმა.