„მე ვფიქრობ, რომ ახალი თაობა მოდის საქართველოში, რომელმაც საბჭოთა პერიოდი გადალახა და ამ მხრივ უკრაინაზე წინ დგას,“ - ამის შესახებ საქართველოს ყოფილმა პრეზიდენტმა, ოდესის ოლქის გუბერნატორმა მიხეილ სააკაშვილმა გადაცემა „განსხვავებულ აქცენტებში“ ისაუბრა.

„საბჭოთა ძონძები კი მოიყარნენ ეხლა ხელისუფლებაში, მაგრამ საბოლოო ჯამში, ეს ხალხი, მასა აბსოლუტურად თავისუფალია საბჭოთა აზროვნებისაგან, სხვა მოტივაცია აქვს და ახალგაზრდობა არის თითქმის 100 პროცენტით თავისუფალი. ჩვენ გვაქვს ძალიან მაგარი მომავალი, ჩვენ უნდა განვაახლოთ ხელახლა მოძრაობა, ეს ყველაფერი მოგვრჩება უკან, უნდა მოვახდინოთ მობილიზაცია, ახალი თაობა უნდა მოვიდეს საქართველოს ყველა სფეროში სათავეში, ერთხელ და სამუდამოდ უნდა მოხდეს გაწევა წარსულის. წარსულმა სცადა ერთხელ აჯანყება, გამოუვიდა რამდენიმე წლით, რატომ ვიძახით მხოლოდ რამდენიმე წლით, იმიტომ რომ წარსულია. ესენი წარსულია, იმიტომ რომ ყველა იმ ფასეულობის წინააღმდეგი არიან, რასაც ჩვენ ვქმნიდით. რა თქმა უნდა ჩვენც შეიძლება წარსული ვიყოთ, მაგრამ ჩვენ ვქმნიდით ამას და ამიტომ ჩვენ კიდევ დიდ ხანს არ ვიქნებით წარსული,“ თქვა მიხეილ სააკაშვილმა და დაამატა, რომ საქართველოს ციხეებიდან უნდა განთავისუფლდნენ „ჩვენი პოლიტპატიმრები“.

„აქ რასაც ვნერგავთ პოლიციაში, ეს ხომ ვანოს მოდელია, რა თქმა უნდა უკრაინის სპეციფიკით. ახალ მე რომ ოდესაში გიგისთანა მერი მყავდეს, ან ლევანისთანა მმართველი რომ მყავდეს, ოდესა იქნებოდა ისეთი ტემპით გაქცეული წინ... და გიგის ციხეში ამყოფებენ და ლევან ვარშალომიძეს არ უშვებენ ბათუმში და საცოდავად მუდმივად „ფეისბუკზე“ დებს ბათუმის სურათებს, ნოსტალგიით კვდება, ახრჩობს, იმიტომ რომ ყველა ქვა მისი დადებულია, ერთი ქვა არ დაუდიათ იმის შემდეგ. თბილისის შემოვლითი გზა, საცობებში იხრჩობა თბილისი, დაკეტილი აქვთ, იმიტომ, რომ გიგის გაკეთებული იყო. აჯანყება იყო პროგრესის წინააღმდეგ, ოროსნების ხუთოსნების წინააღმდეგ, ამიტომ რამდენიც არ უნდა ვილაპარაკოთ, პროგრესს არ აქვს ალტერნატივა. დარწმუნებული ვარ ახალი თაობა მოვა, ლაზიკაც აშენდება, ქალაქიც იქნება და ჩვენს ტერიტორიებსაც გავანთავისუფლებთ, გავანთავისუფლებთ, იმიტომ, რომ რუსეთსაც დიდი ხნის ბედი არ უწერია. ეს წყდება აქ, უკრაინაში. აქედან დავაჩქარებთ რუსული იმპერიის დღევანდელი მოდელის აღსასრულს,“ განაცხადა მიხეილ სააკაშვილმა.