ფუნტი სტერლინგი დოლართან მიმართებაში თითქმის 7 წლის განმავლობაში ყველაზე დაბალ ნიშნულზე დაეცა. ეს კი ბრიტანეთის ევროკავშირში ყოფნა-არყოფნის საკითხს და გაურკვევლობას უკავშირდება. ერთხანს ფუნტი სტერლინგი 2.1%-ით დაეცა და მისმა ღირებულებამ $1.41020 აშშ დოლარი შეადგინა, რაც 2009 წლის შემდეგ ერთ დღეში ყველაზე დიდი დაცემაა.

ბოლო 18 თვის განმავლობაში ფუნტი სტერლინგი აშშ დოლართან მიმართებაში უკვე 17%-ით არის დაცემული, რაც BBC -ს ცნობით, ნაწილობრივ საპროცენტო განაკვეთის გაზრდითაა განპირობებული. 2014 წლის 1 ივლისს 1 ფუნტის ღიღებულება  $1.7165 აშშ დოლარს შეადგენდა და ბოლო წლების განმავლობაში ყველაზე მაღალ ნიშნულზე იმყოფებოდა. 


დიდი ბრიტანეთის ეროვნული ვალუტის გაუფასურება მას შემდეგ მოხდა, რაც ლონდონის მერმა ბორის ჯონსონმა განაცხადა, რომ დაიწყებს კამპანიას, რომელიც ევროკავშირის დატოვებისკენ იქნება მიმართული. ლონდონის მერი, რომელიც ასევე კონსერვატორი პარლამენტარია, აღნიშნავს, რომ რეფერენდუმი არის სიცოცხლის განმავლობაში ერთადერთი შანსი, მასში მონაწილე ამომრჩეველმა თავისი ნება დააფიქსიროს. ჯონსონს მიაჩნია, რომ ბრიტანეთს ევროკავშირის გარეშე "დიდი მომავალი აქვს", ევროკავშირში დარჩენა კი"დემოკრატიის ეროზიას" გამოიწვევს. მისი ეს პოზიცია მნიშვნელოვან დარტყმას მიაყენებს პრემიერ მინისტრის, დევიდ ქამერონის პოზიციას, რომელიც ევროკავშირში დარჩენის მომხრეა.


დევიდ ქამერონი პარლამენტს დღეს ადგილობრივი დროით 15:30 საათზე მიმართავს. იგი ირწმუნება, რომ ევროკავშირმა დიდ ბრიტანეთს "სპეციალური სტატუსი" მიანიჭა.


დიდ ბრიტანეთში რეფერენდუმი ევროკავშირიდან გასვლის შესახებ 23 ივნისს ჩატარდება.