ევროპა არ დაუშვებს რომ საბერძნეთი „ქაოსმა“ მოიცვას, განაცხადა გერმანიის კანცლერმა ანგელა მერკელმა ევროკავშირის წევრ ქვეყნებს შორის მიგრანტთა კრიზისთან დაკავშირებით მკვეთრი აზრთა სხვადასხვაობის არსებობის შესახებ კომენტირებისას. ამის შესახებ BBC წერს.

ავსტრიამ და ბალკანეთის რამდენიმე ქვეყანამ წარმოადგინა შეზღუდვების გეგმა საბერძნეთში გაჭირვებულ მდგომარეობაში მყოფი მიგრანტების მიმართ.

მერკელმა განაცხადა, რომ ევროკავშირის ერებმა საბერძნეთის ევრო ზონაში დარჩენისთვის იმის გამო არ იბრძოლეს, რომ ის „უბედურებაში მიატოვონ“.

მან ასევე დაიცვა მისი გადაწყვეტილება, გაუხსნან გერმანიის საზღვრები მიგრანტებს, მიუხედავად იმისა, რომ ამან მისი პოპულარობის დაცემა განაპირობა. გასულ წელს გერმანიაში 1 მილიონზე მეტი ადამიანი შევიდა, რომელმაც ლტოლვილის სტატუსი მოითხოვა. ამან კი მერკელის მმართველ კოალიციაში ოპოზიციური განწყობები გააძლიერა და მემარჯვენე ექსტრემიზმის ზრდა განაპირობა.

თუმცა ARD ტელევიზიასთან საუბრისას მან თქვა, რომ არ გააჩნია „გეგმა ბ“ და არ შეიცვლის კურსს, უარყო რა მიგრაციაზე შემოთავაზებული შეზღუდვა.

მომავალ კვირეებში ის მთავარი ტესტის წინაშე დგას, როცა გერმანიის სამ შტატში არჩევნები გაიმართება.

საბერძნეთთან დაკავშირებით მერკელმა თქვა: „სერიოზულად გჯერათ, რომ ევროკავშირის ყველა წევრი ქვეყანა, რომელიც გასულ წელს იბრძოდა ყველა გზით, რომ შეენარჩუნებინა საბერძნეთი ევროზონაში, და ჩვენ ყველაზე მკაცრები ვიყავით, ერთი წლის შემდეგ დაუშვებს, რომ საბერძნეთი ქაოსში ჩაეფლოს?“