„კიდევ ერთხელ გამოიხატა ძალიან სერიოზული მზაობა პარტნიორობისთვის ესპანეთის მხრიდან ყველა საკითხში-ეკონომიკური თანამშრომლობა, პოლიტიკური თანამშრომლობა, უსაფრთხოების საკითხები, - განაცხადა საქართველოს პარლამენტის თავმჯდომარემ დავით უსუფაშვილმა ესპანეთის სამეფოს საგარეო საქმეთა მინისტრთან, ხოსე მანუელ გარსია-მარგალოსთან შეხვედრის შემდეგ და დაამატა, რომ ფეხბურთსა და რაგბიზეც ისაუბრეს. "მოვა დრო, როდესაც ქართველები ისე ვითამაშებთ ფეხბურთს, როგორც ესპანელები თამაშობენ და ჩვენ დავამშვიდეთ ესპანელები და ვუთხარით, რომ მოვა დრო და ისინიც ისე ითამაშებენ რაგბის, როგორც ქართველები თამაშობენ," აღნიშნა უსუფაშვილმა.


"ჩვენ მივიღეთ სრული გარანტია იმისა, რომ ესპანეთი იქნება არათუ მხარდამჭერი ვიზალიბერალიზაციის პროცესის წარმატებით დასრულების, არამედ იგი იქნება ერთ-ერთი აქტიური წარმომადგენელი ევროკავშირის, რომელიც, ზოგადად, საქართველოს ევროპასთან დაახლოებას უჭერს მხარს. ესპანეთი, როგორც ნატოს წევრი სახელმწიფო ასევე სერიოზულ როლს ასრულებს ნატოს ეგიდით მისაღებ გადაწყვეტილებებში და რაც მთავარია, ვრცლად ვისაუბრეთ ორმხრივი ურთიერთობების პერსპექტივებზე. ძალიან სასიამოვნოა, რომ სხვადასხვა სამთავრობო უწყებების დონეზე მიმდინარეობს ძალიან კონკრეტული სამუშაოები მეტი ინვესტიციების მოსაზიდად, მეტი ორმხრივად საინტერესო ბიზნეს-პროექტების განსახორციელებლად და ეს ყველაფერი, ეს იდეები ძალიან მალე დაგვირგვინდება. ჩვენ ვისაუბრეთ იმაზეც, რომ ესპანელებიც, ქართველებიც ვართ ხმელთაშუა ზღვის ცივილიზაციის წარმომადგენლები. მოგეხსენებათ. ესპანეთს და საქართველოს ბევრი რამ გვაკავშირებს, არა მხოლოდ ისტორიული დასახელებები - იბერია“ და ასე შემდეგ. და ჩვენ ვისაუბრეთ იმაზეც, რომ მოვა დრო, როდესაც ქართველები ისე ვითამაშებთ ფეხბურთს, როგორც ესპანელები თამაშობენ და ჩვენ დავამშვიდეთ ესპანელები და ვუთხარით, რომ მოვა დრო და ისინიც ისე ითამაშებენ რაგბის, როგორც ქართველები თამაშობენ“," აღნიშნა უსუფაშვილმა.